आँप उत्पादन बढ्ने

दीपकप्रसाद गौतम

वीरगञ्ज, चैत २३ गते । कुल ५५६ हेक्टर क्षेत्रफलमा आँपको खेती हुने गरेको पर्सा जिल्लामा यस वर्ष आँपको उत्पादनमा वृद्धि हुने सम्भावना रहेको जिल्ला कृषि विकास कार्यालय, पर्साले जनाएको छ ।
पर्सा जिल्लामा रहेका आँपका बगैँचा, निजी फार्म तथा खेतमा लगाइएका आँपमा यसपालि बोटले नै थेग्न नसक्ने गरी फूल लागेकाले आँपको उत्पादन बढ्ने सम्भावना देखिएको जिल्ला कृषि विकास कार्यालय, पर्साले जनाएको हो ।
पर्सा जिल्लामा खासगरी मालदह र सबुजा जातिका आँप बढी लगाइएको छ भने आम्रपाली, निलम, मल्लिका, स्वर्ण रेखा जस्ता हाइब्रिड जातका आँप पनि किसानले पछिल्लो समय लगाउन थालेका छन् । जिल्ला कृषि विकास कार्यालय, पर्साको बागबानी शाखाका कृषि प्राविधिक श्याम किशोरप्रसाद कुर्मीका अनुसार पर्सा जिल्लामा खेती हँुदैआएको कुल ५५६ हेक्टर क्षेत्रफलमध्ये यस वर्ष ३२५ हेक्टर क्षेत्रफलमा मात्र लगाइएको आँपको उत्पादन हुनेछ ।
मालदह र सबुजा जातका आँपका बोट प्रायः एक वर्ष फल्ने र अर्को वर्ष नफल्ने भएकाले यस वर्ष ३२५ हेक्टर क्षेत्रफलमा मात्र लगाइएको आँपको उत्पादन हुने कृषि प्राविधिक कुर्मीले बताउनुभयो ।
पर्सा जिल्लाका कृषकले हाइब्रिडभन्दा स्थानीय जातका आँपका बोट बढी रोपेको पाइएकोले उहाँले बताउनुभयो ।
पर्सामा यस वर्ष स्थानीवासीका घर घरमा लगाइएका एकाध आँपका बोटमा समेत बोटले थेग्नै नसक्ने गरी मजुरा हालेको हुनाले आँपको उत्पादन बढ्ने सम्भावना रहेको कुर्मीको दाबी छ । राम्रोसँग हेरचाह गर्न सके यस वर्ष आँपको उत्पादनमा उल्लेख्य रूपमा वृद्धि हुने उहाँले बताउनुभयो । aap
पर्सा जिल्लामा आँपको सिजनमा भारतका विभिन्न ठाउँबाट आँप भित्रिने गरेको छ । यस वर्ष भने आँपको उत्पादन बढ्ने देखिएकोले जिल्लामा बाहिरबाट आँपको आयातमा कमी आउने बताइएको छ ।
पर्सा जिल्लामा पोहोर साल एक हजार आठ सय मेट्रिक टन आँप उत्पादन भएको जिल्ला कृषि विकास कार्यालय पर्साको तथ्याङ्कमा उल्लेख छ ।

 

थप समाचार
प्रतिकृया
नाम

ईमेल

ठेगना