गर्मीसँगै अस्पतालमा बिरामीको चाप बढ्यो


सरोज ढुङ्गेल

काठमाडौ, वैशाख ६ गते । काठमाडौं उपत्यकाका ठूला अस्पतालमा गर्मी मौसमको सुरुवातसँगै गर्मीका कारण उत्पन्न रोगका बिरामीहरुको चाप ह्वात्तै बढ्न थालेको छ ।  महाराजगन्जस्थित कान्ति बाल अस्पतालमा उपचारार्थ आउने बिरामीको संख्यामा शतप्रतिशतले वृद्धि भएको छ भने अन्य अपस्पतालमा पनि उपचार गर्न आउने बिरामीको सङ्ख्यामा वृद्धि भएको जानकारी प्राप्त भएको छ ।
गर्मी मौसम सुरुभएसँगै विशेष गरी बालबालिका बढी प्रभावित भएका छन् भने अन्य उमेर समूहका बिरामीको संख्या पनि वृद्धि भएको छ । चिकित्सकहरूले उपत्यकामा ज्वरो, टाइफाइड, झाडापखाला, आउँ, स्क्रब टाइपस, ठेउलालगायतका रोगको समस्या आएको भन्दै सतर्क रहन सबैसँग आग्रह गर्नुभएको छ ।
वरिष्ठ सरुवा रोग विशेषज्ञ डा. शेरबहादुर पुनले गर्मी मौसमको सुरुवातसँगै टेकुस्थित सरुवा रोग अस्पतालमा दैनिक ३० देखि ४० जना बिरामीहरु ज्वरोको समस्या लिएर आउने गरेको जानकारी दिनुभयो ।
गर्मीमा ज्वरो, फुड प्वाइजन, टाइफाइड, मलेरिया, किटजन्य रोगहरु देखापर्नसक्ने भन्दै उहाँले यस्ता रोगबाट सावधानी अपनाउनुपर्नेमा जोड दिनुभयो । गर्मी मौसममा विशेषगरी खानेपानी र खानेकुरामा विशेष ध्यान दिनुपर्छ, पुनले भन्नुभयो,“हामीले पिउने पानी तथा खानेकुराबाट पनि कतिपय रोगहरु लाग्ने सम्भावना हुन्छ ।” Birami
डा.पुनले गर्मी मौसममा खानेपानीमा पनि विशेष सावधान हुनुपर्ने भन्दै पानी पिउँदा तथा खाना पकाउँदा सफा पानीले मात्र पकाउन सुझाव दिनुुभयो । औसतमा ४० बिरामीमध्ये कतिपय बिरामीहरु टाइफाइड भएका बिरामीहरु आउने गरेको जानकारी दिँदै उहाँले कुनै बिरामी उपचारपछि फर्काउने गरेपछि कतिपयलाई अस्पतालमा भर्ना गरेर राख्ने गरिएको बताउनुभयो ।
उहाँले गर्मी मौसममा पानीबाट सरुवा रोग फैलन सक्ने भन्दै पानीलाई उमालेर पिउनसमेत सुझाव दिनुभयो । उहाँले धाराको पानी, ट्याँकरको पानी र जारकै पानीसमेत उमालेर पिउन सुझाव दिँदै पानी प्रदूषित हुनसक्छ भन्ने जान्दा जान्दै पनि सतर्कता नअपनाइएमा सरुवा रोग फैलने सक्नेतर्फ सचेत गराउनुभयो । उपत्यकामा झाडापखालादेखि टाइफाइड, स्क्रप टाइपस जस्ता सरुवा रोगको जोखिम रहेको छ । डा. पुनले किटजन्य, पंक्षीजन्य तथा पशुजन्य रोगबाट जोगिन सतर्कता अपनाउन पनि आग्रह गर्नुभयो ।  सरुवा रोग अस्पतालका सरुवा रोग विशेषज्ञ डा. अनुप बास्तोलाले वर्षातसंगै झाडापखाला, आँउ, टाइफाइड लगायतका समस्या लिएर आउने बिरामीहरुको संख्या बढेको बताउनुभयो । उहाँले दैनिक पाँचजनासम्म बिरामीहरु भर्ना हुने गरेको जानकारी पनि दिनुभयो ।
गर्मी मौसममा ज्वरो बढ्नसक्ने भन्दै उहाँले ज्वरो आएको बेला घरमै उपचार गर्नुभन्दा तत्काल अस्पताल जान सुझाव दिनुभयो । गत वर्षहरुमा उपत्यकाका तीनवटै जिल्लामा धारामा आउने पानी तथा ट्याङरले ओसार्ने पानीमा समेत कोलिफर्म भेटिएको थियो । डा. बास्तोलाले धारामा आएको र ट्यांकरमा ओसारिएका मात्रै नभई प्राकृतिकरुपमा उम्रिएका पानीसमेत प्रदूषित हुनसक्ने भएकाले पानीजन्य रोगबाट बच्न पानीलाई सफासँग उमालेर खानुपर्ने बताउनुभयो ।
स्क्रव टाइपस, इन्सेफ्लाइटिस, मलेरिया, डेगीलगायतका रोगहरु पनि यही समयमा लाग्ने हुनाले घर वरपर सफा राख्ने, खाल्डाखुल्डी छन् भने पुरिदिने, धेरै दिनसम्म एउटै भाडोमा हालेर पानी नराख्ने गर्नाले पनि किटजन्य रोगबाट बच्नसकिने सुझाव दिनुभयो ।
गर्मी मौसममा ब्याक्टेरियाहरुको सक्रियता बढ्ने गर्दछ । टाइफाइडमा ज्वरो, आउने, टाउको दुख्ने, जिउ दुख्ने, कब्जियत देखिने, निरन्तर एक हप्तासम्म रुघा खोकीको लक्षण देखिने भन्दै यस्तो अवस्थामा पनि तत्काल अस्पताल जान आग्रह गर्नुभयो ।
बीर अस्पतालका निर्देशक डा. भुपेन्द्रकुमार बस्नेतले गर्मी मौसमको सुरुवातसँगै वीर अस्पतालमा दैनिक तीन सय बिरामीहरु थपिएको जानकारी दिनुभयो । उहाँले टाउको दुख्ने, ज्वरो आउने, घाँटी, धूलोको कारणले उत्पन्न हुने बिरामीहरुको संख्यामा वृद्धि भएको जानकारी पनि दिनुभयो ।
उहाँले वीर अस्पतालमा एक हजारदेखि १५ सय बिरामी दैनिक आउनेमा अहिले बढेर दुई हजारसम्म पुगेको बताउनुभयो ।
कान्तिबाल अस्पतालका निर्देशक डा. गणेशकुमार राईले विगत तीन हप्तामा बिरामीको चाप शतप्रतिशतले वृद्धि भएको बताउनुभयो । वर्षात् र गर्मीको सुरुवातसंगै अस्पतालमा झाडापखाला, बमिट,आँउ, फुड पोइजनलगायतका गर्मी मौसमका कारण लाग्ने रोगका बिरामीको चाप बढेको जानकारी पनि दिनुभयो ।
कान्ति अस्पतालका प्रमुख बालरोग विशेषज्ञ डा. कलमराज शर्माले पछिल्लो समय छालाजन्य, पानीजन्य, धूवाधुलोका बिरामीहरुको संख्यामा वृद्धि भएको बताउनुभयो । उहाँले ओपिडिमा पाँचसय बिरामी दैनिक आउनेमा पछिल्लो दुई सातामा त्यो संख्या बढेर आठ सय पुगेको जानकारी दिनुभयो ।
शिक्षण अस्पतालका निर्देशक डा. दीपक महराले जाडोमा भन्दा गर्मी मौसममा बिरामीको चाप बढी हुने गरेको बताउनुभयो । उहाँले अस्पतालमा दैनिक १५ सयदेखि १७ सय बिरामीहरु अस्पतालमा आउने गरेकोमा पछिल्लो समय दुई हजारभन्दा बढी बिरामीहरु ओपिडिमा आएको जानकारी दिनुभयो ।
वरिष्ठ बालरोग विशेषज्ञ डा. ज्योतीरत्न धाख्वाले झाडापखाला, ज्वरो, मलेरियाजस्ता समस्याले बालबालिकाहरुलाई सताउने भन्दै बालबालिकामा अचानक ज्वरो आएमा तत्काल अस्पताल लैजानुपर्ने बताउनुभयो ।
उहाँले बालबालिकाहरुलाई सङ्क्रमणयुक्त रोगहरुपछि किरा फट्याङ्ग्रा, उडुस, उपिँया, लामखुट्टेजस्ता किटजन्य टोकाइको माध्यमबाट पनि बालबालिकाहरुलाई छालामा सङ्क्रमण, एलर्जी हुने खतरा बढी हुने भएकाले त्यस्ता रोगमा समेत अभिभावकहरु सचेत हुनुपर्ने बताउनुभयो ।

थप समाचार
प्रतिकृया
नाम

ईमेल

ठेगना