नेकपाको ६९ औं स्थापना दिवस:  संयुक्त कार्यक्रम आज

nekapaकाठमाडौंँ, वैशाख ९ गते । नेपाल कम्युनिस्ट पार्टी स्थापनाको ६९ औं स्थापना दिवसलाई दुई वाम दल नेकपा (एमाले) र नेकपा माओवादी (केन्द्र)ले आइतबार एकै ठाउँमा मनाउँदै छन् । एकताको सन्देश दिने उद्देश्यका साथ कार्यक्रम तय गरिएको एमाले केन्द्रीय कार्यालयका सचिव कृष्णगोपाल श्रेष्ठले जानकारी दिनुभयो । 

पार्टी एकता संयोजन समितिको आयोजनामा स्थापना दिवसको कार्यक्रम राष्ट्रिय सभागृहको सभाहलमा गर्न लागिएको छ । कार्यक्रममा एमाले अध्यक्ष केपी शर्मा ओली र माओवादीका अध्यक्ष पुष्पकमल दाहाल ‘प्रचण्ड’ले संयुक्त रूपमा सम्बोधन गर्ने पनि श्रेष्ठले जानकारी दिनुभयो । केही दिनदेखि सघन वार्तामा रहनुभएका अध्यक्षद्वयले आइतबारको कार्यक्रमबाट पार्टी एकता घोषणाको मिति सार्वजनिक गर्न सम्भावना रहेको श्रेष्ठले जानकारी दिनुभयो । “स्थापना दिवसमा केही न केही ठोस सन्देश दिने भन्दै अध्यक्षहरू तीन दिनदेखि सघन संवादमा हुनुहुन्छ”, श्रेष्ठले भन्नुभयो, “वैशाख १८ गते मजदुर दिवस परेकाले सम्भवतः त्यही दिन पार्टी एकता घोषणाको उपयुक्त दिन हुन्छ, त्यो नभए वैशाख २२ गते हुन्छ । ”
यसअघि वैशाख ९ (अप्रिल २२) मा पार्टी एकताको घोषणा गर्ने तयारी गरेका दुवै दलको गृहकार्य नपुगेको भन्दै नयाँ मितिबारे विकल्पको खोजी भएको श्रेष्ठले बताउनुभयो । तत्कालीन जहाँनिया राणा शासनविरुद्ध आन्दोलन चलिरहेका बेला विसं २००६ वैशाख ९ गते (अप्रिल २२, १९४९) कम्युनिस्ट नेता पुष्पलाल श्रेष्ठको नेतृत्वमा भारतीय भूमि कलकत्तामा नेपाल कम्युनिस्ट पार्टीको जन्म भएको थियो । नेता श्रेष्ठ, नरबहादुर कर्माचार्य, नारायण विलास जोशी, मोतिदेवी श्रेष्ठ र निरन्जनगोविन्द वैद्य पार्टीको संस्थापक हुनुहुन्थ्यो । तर, अहिले संस्थापकमध्ये कोही पनि जीवित हुनुहुन्न ।
वैशाख ९ मा एकता सम्भव नभएपछि अब पहिलो प्राथमिकतामा यी दुई दिनबारे छलफल सुरु भएको नेता श्रेष्ठको दाबी छ । वैशाख १८ मा पर्ने मजदुर दिवस र कार्ल माक्र्स जन्मेको दिन वैशाख २२ का बारे छलफल केन्द्रित भएको जानकारी दिनुहुँदै उहाँले “विवादका विषयमा दुई अध्यक्षबीच सहमति बने वैशाख १८ गते पार्टी एकता तय हुनसक्छ, नभए वैशाख २२ मा हुन्छ । ”
दुई दलबीच पार्टीको संरचनागत कमिटीमा समानताको हिसाबले दुवै दलका नेताको प्रतिनिधित्व गराउने वा प्रतिशतको अनुपात गर्ने भन्ने विवाद कायमै छ । त्यस्तै, माओवादी केन्द्रले उठाएको जनयुद्ध शब्द नयाँ पार्टीको विधानको प्रस्तावनामा उल्लेख गर्ने या नगर्ने अर्को विवाद छ । त्यस्तै, नयाँ दलको चुनाव चिह्न सूर्य मान्ने या त्यसभित्र हसिया हथौडा राख्ने भन्ने विवादको विषय छ ।

 

थप समाचार
प्रतिकृया
नाम

ईमेल

ठेगना