असार ३ गते कात्तिक नाच पहिलोपटक राष्ट्रिय नाचघरमा

katik nirtya

गोरखापत्र समाचारदाता
ललितपुर, जेठ २९ गते । आउँदो असार ३ गते कात्तिक नाच पहिलोपटक राष्ट्रिय नाचघरमा प्रदर्शन हुन लागेको छ । यसअघि मंगलबजार कात्तिक डबलीमा प्रत्येक वर्ष कार्तिकमा उत्त नाच प्रदर्शन हुने ऐतिहासिक परम्परा रहिआएको थियो । कात्तिक नाच पाटनका मल्ल राजा सिद्धीनरसिंह मल्लले तीनसय ८० वर्ष अघि शुरुवात गर्नुभएको हो ।

कात्तिक नाच विगतमा कात्तिक महिनाभर कात्तिक डबलीमा प्रदर्शन गरिन्थ्यो । केही वर्ष अघि आर्थिक अभावका कारणले कात्तिक नाच प्रदर्शन हुन छोडेको थियो । कात्तिक नाच विष्णुको अवतार नरसिंह, राजा हिरन्य कस्यप र विष्णु भक्त प्रल्हादको कथामा आधारित छ । कात्तिक नाच शुरु गर्दा राजा सिद्धीनरसिंह मल्ल आँफैले अभिनय गर्नुभएको इतिहास छ ।

नेपाली मौलिक नृत्यहरुलाई डबलीभन्दा बाहिर प्रदर्शन गरेर ऐतिहासिक नाचलाई आर्थिक रुपमा जीवित राख्न पहिलो पटक नाचघरमा प्रदर्शन गर्न लागेको नृत्य निर्देशक संघ नेपाल, ललितपुर शाखाले दावी गरेको छ ।
नेपालमा नृत्य विधामा एकल साँझको रुपमा ‘स्वजन रघुवंशी एकल साँझ’ मार्फत् उक्त नाच प्रदर्शन हुँदैछ । कलाकार स्वजन रघुवंशीको कात्तिक नाचमा मुख्य अभिनय हुनेछ ।

लोपोन्मुख नृत्यहरुको संरक्षण गर्दै अन्तर्राष्ट्रिय क्षेत्रमा यसको पहिचान गराउने उद्देश्यसहित कात्तिक नाच, चर्या नृत्य, भरत नाट््यम, कत्थक, झ्याउरे र साल्सा नृत्य समेत कलाकार स्वजन रघुवंशीबाट प्रस्तुत हुने आयोजकले जानकारी दिएको छ ।
कलाकार रघुवंशीले कार्यक्रममा अन्य प्रस्तुतिसहित करिब १५ मिनेट लामो कत्थक नृत्य प्रस्तुत गर्नुहुनेछ । लाइभ वाद्यवादनसँगै सैद्धान्तिक र व्यवहारिक पक्षलाई ध्यानमा राखेर नृत्य प्रस्तुत हुने भएकाले नेपालमा नविन प्रस्तुति हुने कलाकार रघुवंशीले गोरखापत्रलाई जानकारी दिनुभयो ।

कत्थक नृत्य विधाको स्नातकमा स्वर्ण पदक हासिल गरेका कलाकार स्वजन रघुवंशी ब्याचलर अफ फाइन आर्टमा उत्कृष्ट विद्यार्थी हुनुहुन्छ । करिब २७ वर्षे कलाकार रघुवंशीले देश तथा विदेशमा विभिन्न प्रस्तुति र कार्यशालामा भाग लिनुभएको छ । –उपेश महर्जन

थप समाचार
प्रतिकृया
नाम

ईमेल

ठेगना