नारायणगढ–मुग्लिन सडक नयाँ ठाउँबाट सडक बनाउन सुझाव

वसन्त पराजुली

भरतपुर, असार २८ गते । मुुलुकको अर्थतन्त्र र जनजीवनको मूल मार्गनारायणगढ–मुग्लिन सडक पुनःनिर्माणको काम नसकिदै सडक भासिनुमा पुरिएको माटोमाथि सडक विस्तार र तलबाट त्रिशूली नदीको कटानलाई प्रमुख कारण आँैल्याइएको छ । भूगर्भविद् अच्यूत कोइराला नेतृत्वको टोलीले बुधबार सडकको स्थलगत निरीक्षण गर्दै सडक भासिएको ठाउँमा डाइभर्सन बनाएर नयाँ ठाउँबाट सडक बनाउनुपर्र्नेे सुझाव दिएको छ ।

नारायणगढ–मुग्लिन सडकको १७ किलो र भतेरी ओरालोमा सडक नै भासिएपछि भूगर्भविद् कोइरालाको नेतृत्व टोलीले स्थलगत अध्ययन गरेको हो । “विगतमा पनि यो ठाउँ (१७ किलो) सडक भासिने समस्या भइरहेको ठाउँ हो । पहिला चिनियाँले सडक निर्माण गर्दै गर्दा यहाँ पुरुवा माटोमाथि सडक निर्माण गरेका र अहिले त्यसैलाई निरन्तरता दिदै माथिबाट सडक बनाउँदा भासिने समस्या भयो”, भूगर्भविद् कोइरालाले भन्नुभयो, “ सडक भासिने क्रम अझै बढ्दै जाने छ ।”

muglin sadak

नारायणगढबाट १७ किलो मिटर मुग्लिनतर्फ रहेको १७ किलोमा ३० मिटर लम्बाई र सात मिटर सडक भासिने गरी चिरिएको छ । यो मात्रा बढेर अझै ७० मिटर लम्बाई र आठ मिटर चौडाइसम्म पुग्ने कोइरालाको अनुमान छ ।
“जति पुरिएको छ त्यो सबै खस्छ”, उहाँले थप्नुभयो, “पुरिएको ठाउँ छाडेर भित्ता काटेर डाइभर्सन गर्नुनै स्थायी समाधान हो ।” माथि पुरुवा माटो र तल त्रिशूली नदीको कटान नै यो क्षेत्रको समस्या भएको उहाँको तर्क छ ।
१७ किलोमा सडक भासिने समस्या पुरानै रोग भएको जनाउँदै उहाँले त्यसको समाधान नखोजी अहिले सडक विस्तार गरिनुपनि कमजोरी भएको औँल्याउनुभयो । २०६० साल तिरै यो क्षेत्रमा सडक भासिएर सडकको चट्टान भित्रैवाट रड छिराएर गरिने प्रविधि ‘रक एङ्करिङ’ गरिएको थियो । यसले केही वर्ष सम्म त सडक भासिनबाट रोकियो । तर फेरी अहिले यहि समस्या दोहोरिएको विज्ञहरु बताउनुहुन्छ ।
‘रक एङ्करिङ’ को काम नै असफल भए नभएको भन्नेबारे भने थप अध्ययन गर्नुपर्ने पनि कोइरालाले जनाउनुभयो । तर सडक भासिने काम नरोकिएपछि अहिले सडक भएको ठाउँभन्दा पहाडतिर विस्तार गर्नुपर्ने उहाँको सुझाव छ ।
यसबाहेक अहिले सडक चिरिएर भासिने अवस्था पुगेको भतेरी ओरालोमा सडक छेउको प्याराफिट भासिने अवस्थामा छ । यहा पनि सडक नै चिरिएर कहिले खस्ने हो भन्ने समस्या देखिन्छ । यो ठाउँमा पनि तलबाट माटो पुरिएकै कारण समस्या भएको बताइन्छ ।
नारायणगढ–मुग्लिन सडक विस्तारका लागि सन् २०१५ को अप्रिलमा सम्झौता भएको थियो । यो सम्झौता अनुसार २०१६ को अप्रिल १९ मा पूरा गर्नुपर्ने भए पनि पटक पटक म्याद थप गरीअहिले यो सडकको निर्माण काम अन्तिम चरणमा पुगेको छ । यो सडकको ३६ किलोमिटर दुरीमध्ये अहिले साढे ३३ किलो मिटर खण्ड विस्तार गर्न निर्माण गरिएको हो ।
यो सडकलाई एसियाली मापदण्डअनुरुपको दुईलेनको बनाउने योजना अनुसारकै सडकको विस्तार काम भइरहेको हो । यसका लागि नेपाल सरकारले विश्व बैङ्कको झन्डै तीन अर्ब रुपियाँ ऋण सहयोग लिएर सडक विस्तार गरिरहेका बेला सडकका विभिन्न क्षेत्रमा भासिने समस्या र माथिबाट पहिरो खस्ने समस्या देखिएपछि प्राविधिकहरु पनि चिन्तित देखिन्छन् ।
यो सडकका३१ स्थानमा सडक माथिका पहाडबाट पहिरो खस्ने जोखिम क्षेत्र छन् । नारायणगढ–मुग्लिन सडक आयोजनाका परामर्श दाता इन्जिनियर पुस्कर रेग्मी माथिबाट खस्ने पहिरो नियन्त्रणका लागि पहल भइरहेपनि सडक नै भासिने समस्या भएपछि झनै जटिल भएको जनाउनुहुन्छ ।
“सडक भासिनु समस्या भयो यसको दीर्घकालीन समाधान खोज्नुपर्छ’, उहाँले भन्नुभयो ।
सडक आयोजनाका प्रमुख रोहितकुमार विसुराल विज्ञटोलीको सुझावअनुसार नै सडकको मर्मत सुधार गरिने बताउनुहुन्छ ।
“सडक भासिने समस्या भयो यसको समाधानका लागि विज्ञटोलीले अध्ययन गरिरहेको छ उनीहरुको सुझावअनुसार नै मर्मत सुधार गर्ने वा डाइभर्सन गराएर सडक विस्तार गर्ने भन्ने काम हुनेछ”, उहाँले भन्नुभयो ।

 

 

थप समाचार
प्रतिकृया
नाम

ईमेल

ठेगना