साउनमा पाक्ने गहुँ असारमै


हुम्ला समाचारदाता

gahuसिमकोट, असार २९ गते । सधँै साउनमा पाक्नुपर्ने माथिल्लो हुम्लाको गहुँ यसपालि असारमै पाकेको छ । गहुँको बोटलाई आवश्यक पर्ने पौष्टिक तत्त्व समयमै पाउनु र मौसममा आएको परिवतर्नले गहुँ चाँडो पाकेको हो ।
विशेष गरेर माथिल्लो हुम्ला खार्पुनाथ, सिमकोट र नाम्खा गाउँपालिकामा साउन दोस्रो हप्तातिर पाक्ने गहुँ यसपालि असार तेस्रो हप्तामै पाकेको सिमकोट गाउँपालिका ३ की किसान कार्जुमा लामाले बताउनुुभयो । पाँच हल गोरु लाग्ने जग्गामा गहुँ छरेर भित्र्याउँदै गर्नु भएकी लामाले गहुँ राम्रो फलेको बताउनुुभयो । केहीअघिको खडेरीले समस्या नगरेको भए अझै गहुँ झनै राम्रो हुने उहाँले सुनाउनुुभयो । सिमकोट गाउँपालिकाका सबै वडाका किसानलाई यतिखेर गहुँ थन्क्याउन हतारो देखिन्छ ।
गहुँ बाली सिमकोट आठको स्याँडामा राम्रो फलेको र यो वर्ष गहुँ चाँडै पाकेको अनुभव सोही वडाका परिमल बुढाले सुनाउनुुभयो । दक्षिणी हुम्लामा गहुँ जेठमै पाकेको भए पनि माथिल्लो हुम्लामा यसपालि चाँडो पाक्नुमा गहुँको बोटले आवश्यक पौष्टिक आहार समयमै पाउनुु र मौसम परिवर्तन नै मुख्य कारण भएको जिल्ला कृषि विकास कार्यालयका प्रमुख डा. चन्द्रप्रसाद रिसालले बताउनुभयो ।
यस वर्ष हुम्लामा एक हजार २५ हेक्टरमा गहुँ लगाएकोमा एक हजार १२७ मेट्रिक टन उत्पादन हुने कार्यालयले प्रक्षेपण गरेको छ ।

थप समाचार
प्रतिकृया
नाम

ईमेल

ठेगना