नेपाली चलचित्रले पुनर्जीवन पाएकै हो ?

nai nabhanu 3काठमाडौं । वि.स. २०७० सालको अन्तिम चार महिना नेपाली चलचित्र प्रदर्शनका दृष्टिले त्यति सफल मानिएन । यो अवधिमा एक महिनामा प्रदर्शन भएका एक दर्जन जति नै चलचित्रले नेपाली दर्शकलाई तान्न सकेनन् तर चैतको अन्तिम साता एकै पटक प्रदर्शनमा आएका तीन चलचित्र ‘नाई नभन्नु ल ३’ ‘हबल्दार सुन्तली’ र ‘सेतो बाघ’ ले भने बक्स अफिसमा उत्साहजनक प्रदर्शन गर्न सफल भएका छन् । ‘सेतो बाघ’ बाहेक ‘नाई नभन्नु ल ३’ र ‘हबल्दार सुन्तली’ले एक हप्ताको बीचमा डेढ करोड रुपियाँ माथिको व्यापार गरे । प्रदर्शनको पहिलोे दिन तीन चलचित्रले समग्रमा ३७ लाख रुपियाँको कारोबार गरे पनि लगातार पाँच दिनको अवधिमा यी चलचित्रहरूको आम्दानी एक करोड रुपियाँभन्दा बढी नै हुन पुग्यो । ‘नाई नभन्नु ल ३’ ले हालसम्म दुई करोड रुपियाँको हाराहारीमा आम्दानी गरिरहेको बुझिएको छ ।
यसरी राम्रा चलचित्रहरू एकै पटक यसरी जुद्धा चलचित्र निर्माताहरूको आम्दानी बाँडिने निश्चित भए पनि कुन चलचित्र राम्रो हो भन्नेमा दर्शकहरूको लागि पनि एक प्रकारको अन्योलता देखिएको छ । यी चलचित्रहरूले समावेश गरेको विषयवस्तु आफंैमा मौलिक र सत्य घटनाहरूमा आधारित भनिएको कारण पनि दर्शकहरू हालसम्म तानिएको देखिन्छ । आफ्नै हाकीमबाट बलात्कृत भएकी नेपाल प्रहरीमा कार्यरत सुन्तली धामीको जीवनीमा आधारित चलचित्र हबल्दार सुन्तलीको कथावस्तु भएकोले दर्शकहरूलाई यो चलचित्रले बढी नै तानेको देखिएको छ । चल्तिका नायिका रेखा थापाजस्तै देखिने शिल्पा पोखरेलको अभिनय रहेको यस चलचित्र छविराज प्रोडक्शनमा बनेको चलचित्र हो ।
‘चलचित्र नाई नभन्नु ल २’ को सफलतापछि सिक्वेलको रूपमा बनेको चलचित्र ‘नाई नभन्नु ल ३’ मा मुस्कान ढकाल पहिलोपटक निर्देशकको रूपमा उत्रिएका हुन् भने लामो समयपछि चलचित्र क्षेत्रमा फर्किएकी नायिका सञ्चिता लुइँटेलको लागि पनि यसै चलचित्रमार्फत यो क्षेत्रमा पुनरागमन भएको हो । हाल दर्शकहरूले अति नै रुचाएको यस चलचित्र गीत संगीतको कारण पनि निकै चर्चामा छ । ‘नाई नभन्नु ल ३’ को व्यापार बिग मुभिज क्यूएफएक्स, एफक्यूबजस्ता मल्टिप्लेक्स हलहरूमा बढी देखिएको छ ।
डायमनशमशेर राणाको चर्चित उपन्यासमा आधारित चलचित्र ‘सेतो बाघ’ हेर्न पनि दर्शकहरू निकै उत्साहित देखिएका छन् । नेपाली राजनीतिको पुरानो घटनाक्रमहरूलाई चलचित्रले सेतो बाघमार्फत रोचक ढंगमा प्रस्तुत गर्न सफल भएको छ । कलाकार निर शाहद्वारा निर्देशित सेतो बाघ इतिहासलाई प्रतिनिधित्व गर्ने ऐतिहासिक चलचित्र भएकोले युवा पुस्ताको ध्यान पनि यस चलचित्रले निकै तानेको छ । गतवर्षको अन्तिम केही महिनामा नेपाली चलचित्र निर्माताहरूको लागि असफल सावित भए पनि नेपाली चलचित्र ‘जेरी’ पछि हलहरूमा नेपाली चलचित्र हेर्नेको भीड लागेको र बक्स अफिसमा राम्रो आम्दानी गर्न सफल भएको यी तीन चलचित्रले बाँकी दिनहरूमा कतिको दर्शकको मन जित्नेछन्् त्यो भने प्रतिक्षाकै विषय बनेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds