काबेली कोरिडोरको काम अन्तिम चरणमा


कोकिला ढकाल

इलाम, साउन १० गते । पूर्वका इलाम, पाँचथर र ताप्लेजुङमा उत्पादित विद्युत्लाई एकीकृत गर्न निर्माणाधीन काबेली कोरिडोरको काम अन्तिम चरणमा पुगेको छ । काबेली प्रसारण लाइन आयोजनाअन्तर्गत इलामको गोदक, पाँचथरको अमरपुर र झापाको लखनपुरमा सब–स्टेसन निर्माण भइसकेका छन् ।
अहिले बाँकी रहेका १९ वटा विद्युत् टावर निर्माणको काम भइरहेको आयोजना प्रमुख दीपेन्द्रराज द्विवेदीले बताउनुभयो । इलामको सिद्धिथुम्का, चमैता र पाँचथरको जोरसालमा १९ वटा टावरका लागि टावर ठड्याउने, तार टाङ्नेदेखि तारको बाटोमा सफाइ गर्ने काम हुँदैछ, द्विवेदीले भन्नुभयो । अब असोजसम्ममा आयोजनाको सबै काम सकिन्छ र विद्युत् सप्लाईको पूर्ण काम सुरु हुन्छ ।
द्विवेदीका अनुसार १९ वटा टावरको काम सक्दा इलाम र फिदिमबीच १६५ वटा टावर निर्माण भइसक्ने छन् । पाँच वर्षदेखि सुरु भएको आयोजनाको काम तोकिएको समयमा पूरा नभएपछि यसअघि डेढ वर्ष म्याद थप गरिएको थियो । अब भने तोकिएको समयमा आयोजना पूरा हुने प्रमुख द्विवेदीले बताउनुभयो ।
कोरिडोरबाट पाँचथरको ६० मेगावाट र इलामको ७० मेटावाट विद्युत् यो आयोजनामार्फत विद्युत् केन्द्रीय प्रसारण लाइनमा जोडिने छ । कोरिडोरको क्षमता १५० मेगावाटको हो, आयोजना सञ्चालनमा आएपछि पूर्वमा भरपर्दो र भोल्टेज पूरा भएको बिजुली हुनेछ, द्विवेदीले भन्नुभयो । kabeli_1
विश्व बैङ्कको दुई अर्ब ५८ करोड रुपियाँको लगानीमा नेपाल विद्युत् प्राधिकरणले कोरिडोर निर्माणको काम गरिरहेको द्विवेदीले जानकारी दिनुभयो । उहाँका अनुसार कोरिडोरमा उत्पादित २९ मेगावाटको सानिमा माई हाइड्रोपावर र ६.२ मेगावाट क्षमताको पुवाखोलाको विद्युत् यसअघि कोरिडोरमा जडान गरी सकिएको छ ।
यस्तै, पञ्चकन्या माइहाइड्रोको १८.१ मेगावाट, हिमाल दोलखा ४.५, जोशी हाइड्रो पावरको ३.५ मेगावाट, हिमाल दोलखा हाइड्रोको आठ मेगावाट, पुवाखोला एकको ३.५ मेगावाट र पाँचथरमा निर्माणाधीन हेवाखोला ‘ए’ को १५ मेगावाट, काबेली ‘ए’ को ३७ मेगावाट विद्युत् कोरिडोरमा समावेश हुनेछ ।
यस्तै इलामको सिद्धिखोलामा निर्माण सुरु भएको दस मेगावाटको सिद्धिखोला जलविद्युत्, इलाम नगरपालिका–५ बरबोटे र वडा २ सुम्बेकस्थित माइखोलामा निर्माण हुँदै गरेको ७.८ मेगावाटको सुपरमाई जलविद्युत् आयोजना निर्माणपछि काबेली कोरिडोरमै जोडिने छ । यस्तै इलामकै सुम्बेकमा ९.१ मेगावाटको सगरमाथा जलविद्युत् आयोजना निर्माण सुरु हुन लाग्दैछ । पुवाखोलामा चार मेगावाटको पुवाखोला– दुई र माइबेनीमा ९.२ मेगावाटको आयोजना पनि काम सुरु गर्ने तयारी रहेको जनाइएको छ ।

थप समाचार
प्रतिकृया
नाम

ईमेल

ठेगना