करोडको खसीबोका बिक्री

बाग्लुङ समाचारदाता

बाग्लुङ, साउन १४ गते । बाग्लुङको एक गाउँका कृषकले खसीबोका बेचेर बर्सेनि एक करोड बढी रुपियाँ गाउँमा भित्र्याउन सफल भएका छन् । बाग्लुङको काठेखोला गाउँपालिका–४ तङ्ग्राम फापरखेतका किसानले व्यावसायिक बाख्रापालनबाट बर्सेनि एक करोड रुपियाँभन्दा बढी भित्र्याउन सफल भएका हुन् ।
केही वर्षदेखि व्यावसायिक रूपमा बाख्रपालनमा लाग्न सुरु गरेका गाउँलेले वर्ष एक हजारभन्दा बढी खसीबोका बिक्री गर्न सफल भएको स्थानीय किसान बताउँछन् । गाउँमा परम्परागत रूपमा बाख्रापालन गर्दै आइरहेका र विदेशबाट फर्केर आएका युवा व्यावसायिक रूपमा बाख्रापालनमा लागेकाले बर्सेनि करोडौँ रुपियाँ गाउँमा भित्रिने गरेको स्थानीय किसान यामबहादुर पुनले बताउनुभयो ।
केही वर्षअगाडि गाउँलाई पशुपालनका क्षेत्रमा आत्मनिर्भर बनाउने उद्देश्यले हेफर इन्टरनेसनलको सहयोगमा भीमापोखरा युवा क्लबमार्फत पशु प्राविधिकसहितको सेवा उपलब्ध भएपछि किसान व्यावसायिक रूपमा बाख्रापालनमा लागेका थिए । गाउँका किसानले उन्नत जातका बाख्रासँगै पशु प्राविधिकको निगरानीसमेत पाएपछि व्यावसायिक बन्न सहज भएको पुनले बताउनुभयो । khasi
लामो समय दक्षिण कोरियामा रोजगारीबाट फर्कनुभएका सुरेश घर्तीमगरले गाउँका सबै दाजुभाइ व्यावसायिक बन्दै गएको देखेपछि आफू पनि दक्षिण कोरिया जान छाडेर यहीँ बाख्रापालनमा लागेको बताउनुभयो । अहिले ४० वटा बाख्रा पाल्नुभएका घर्तीको दैनिकी बिहानदेखि साँझसम्म बाख्राको हेरचाहमा बित्ने गरेको छ । रोजगारीका लागि बहराइनमा लामो समय बसेर फर्कनुभएका मेखबहादुर पुन, स्थानीय चन्द्रबहादुर पुनको परिवार पनि बाख्रापालनबाटै बर्सेनि मनग्ये आम्दानी गर्न सफल भएको बताउँछन् ।
बाख्रापालन तथा उनीहरूको पेसा व्यवस्थापनका लागि गाउँमा गठित सप्तरङ्गी सामाजिक उद्यमी महिला विकास सहकारी संस्था र वसन्त सामाजिक उद्यमी महिला विकास सहकारी संस्थामार्फत कृषकलाई बाख्रापालनमा सक्रिय बन्दै गइरहेका छन् । सहकारीका सेयर सदस्यलाई बाख्रापालन व्यवसायमा केन्द्रित गराउने तथा कृषकका उत्पादन प्रतिकेजी पाँच सय रुपियाँमा खरिद गरेर बजारमा बिक्री वितरणको व्यवस्था गरेपछि बाख्रापालन गर्नेको सङ्ख्या बढेको सप्तरङ्गी सामाजिक उद्यमी महिला सहकारी संस्थाकी अध्यक्ष थमकुमारी श्रीसले बताउनुभयो । दुई सहकारी संस्थाले साप्ताहिक रूपमा कृषकका उत्पादन खरिद गर्ने र बजारसम्म पठाउने कार्यतालिका तयार गरी किसानको उत्पादन खरिद गर्दै आइरहेको छ । आर्थिक वर्ष २०७४÷७५ मा सप्तरङ्गी सहकारीमार्फत ७८५ वटा खसी बिक्री गरी ८६ लाख रुपियाँ र वसन्त सहकारीमार्फत १४० गोटा खसीबोका बिक्री गरी १४ लाख ९० हजार छ सय रुपियाँ आम्दानी गर्न सफल भएको सहकारीका प्रबन्धक मनकुमारी पुनले जानकारी दिनुभयो ।
त्यस क्षेत्रका किसानलाई सहकारी तथा आयआर्जनका क्षेत्रका काम गरिरहेका सहकारी क्षमता विकास सहजकर्ता रिता शर्माले केही वर्ष पहिलेसम्म घरमा १÷२ वटा बाख्रापालन गर्दै आइरहेका किसान व्यावसायिक रूपमा ३९÷४० वटा बाख्रापालन गर्दै आइरहेको बताउनुभयो । पहाडी भू–भाग, पर्याप्त मात्रामा चरन क्षेत्र र डालेघाँस पाइने त्यस क्षेत्रमा बर्सेनि एक करोड रुपियाँभन्दा बढी रकम एउटै गाउँमा आउने भएपछि अन्य किसान पनि व्यावसायिक बाख्रापालनमा लाग्न थालेको उहाँ बताउनुहुन्छ ।

 

थप समाचार
प्रतिकृया
नाम

ईमेल

ठेगना