‘मिनी पार्लियामेन्ट’ सक्रिय

गोरखापत्र समाचारदाता

काठमाडौँ, साउन २२ गते । सङ्घीय संसद् अधिवेशन सुरु भएको पाँच महिनापछि गठित संसद्का विषयगत समितिहरू सक्रिय भएका छन् ।  गत बिहीबार गठित प्रतिनिधिसभाका १० वटै समितिले सोमबारदेखि औपचारिक रूपमा काम थालनी गरेका हुन् । संसदका १० वटै समितिको पहिलो बैठक सोमबार बसेको हो ।
‘मिनी पार्लियामेन्ट’ सक्रिय भएसँगै सरकारका काम कारबाही र जनचासोका विषयमा पूर्ण सदन बाहेक समितिमा छलफलको पनि विकल्प खुलेको छ । समितिहरूका पहिलो बैठक परिचयात्मक र सभापति चयन नहुँदासम्मका लागि ज्येष्ठ सदस्य तोक्ने विषयमा मात्र केन्द्रित भएका छन् । parlament of nepal
सङ्घीय संसद् सचिवालयका सचिव भरतराज गौतमले पहिलो बैठक परिचयात्मक र भावी काम कारबाही कसरी अघि बढाउने भन्नेमा मात्र केन्द्रित रहेको बताउनुभयो । गौतमले भन्नुभयो–‘विशेषतः पहिलो बैठक परिचयात्मक नै हुने हो । भावी काम कारबाही कसरी अगाडि बढाउने, कार्यविधि के कसरी तय गर्ने भन्ने विषयहरू पनि प्राथमिकतामा पर्छन ।’
सोमबारका सबै विषयगत समितिको बैठक पनि परिचयात्मक कार्यक्रममै सकिएको थियो । समितिहरूले स्थायी सभापति चयन नहुँदासम्मका लागि ज्येष्ठ सदस्य पनि चयन गरेका छन् । स्थायी सभापति भने समितिको निर्णयका आधारमा सभामुखले निर्वाचन कार्यक्रम प्रकाशन गर्न संसद् सचिवालयलाई निर्देशन दिने अभ्यास छ ।
कुन समितिमा को ज्येष्ठ सदस्य
सोमबार प्रतिनिधिसभाका सबै समितिहरूले ज्येष्ठ सदस्यको नाम तय गरेका छन् । समितिहरूको विवरण अनुसार कानुन, न्याय तथा मानवअधिकार समितिको ज्येष्ठ सदस्य लक्ष्मणलाल कर्ण चयन हुनुभएको छ । सभापति चयन नहुँदासम्म कर्णले बैठक सञ्चालन गर्नुहुनेछ । कर्ण संसदीय सुनुवाइ समितिमा पनि ज्येष्ठ सदस्य हुनुहुन्छ ।
यस्तै, राज्य व्यवस्था समितिमा मीना पाण्डे, महिला, बालबालिका समितिमा नन्दलाल रोकाय, सार्वजनिक लेखा समितिमा विमल श्रीवास्तव, अर्थ समितिमा महन्थ ठाकुर ज्येष्ठ सदस्य चयन हुनुभएको छ । उहाँले पनि सभापति चयन नहुँदासम्म समिति बैठक सञ्चालन गर्नुहुनेछ ।
यस्तै, अन्तर्राष्ट्रिय सम्बन्ध समितिमा माधवकुमार नेपाल, कृषि तथा सहकारी समितिमा सत्यनारायण शर्मा, विकास समितिमा जिपछिरिङ लामा, उद्योग वाणिज्य समितिमा मुकुन्द न्यौपाने र शिक्षा तथा स्वास्थ्यसम्बन्धी समितिमा मानबहादुर विश्वकर्मा ज्येष्ठ सदस्य तय हुनुभएको छ । ज्येष्ठ सदस्यहरूले समितिको स्थायी सभापति चयन नहुँदासम्म बैठक सञ्चालन गर्नुहुनेछ ।

 

थप समाचार
प्रतिकृया
नाम

ईमेल

ठेगना