चोभारमा सुख्खा बन्दरगाह निर्माण कार्य सुरु


भउचप्रसाद यादव

काठमाडौँ, साउन ३१ गते । काठमाडौँ उपत्यकामा आउने मालवाहक सवारी साधनको व्यवस्थापन तथा एकीकृत भन्सार जाँच चौकीको समेतको काम गर्ने गरी चोभारमा सुख्खा बन्दरगाह (काठमाडौँ कन्टेनर फ्रेट स्टेसन) निर्माण कार्य सुरु भएको छ ।  निर्माण कार्य सुरु भए पनि औपचारिक शिलान्यास कार्य छिट्टै हुने जानकारी उद्योग, वाणिज्य तथा आपूर्ति मन्त्रालयका सहसचिव तथा प्रवक्ता नवराज ढकालले दिनुभयो ।
विदेशबाट सामान आयात गर्न र नेपालबाट उत्पादिन सामान निर्यात गर्ने उद्देश्यसहित यो बन्दरगाह निर्माण गर्न लागिएको हो । बन्दरगाहलाई भारतको रक्सौलबाट र चीनको केरुङबाट आउने रेलमार्ग तथा बाहिरी चक्रपथसँग जोडिने योजना रहेको छ ।
नेपाल–भारत क्षेत्रीय व्यापार तथा पारवहन आयोजना अन्तर्गत नेपाल इन्टरमोडल यातायात विकास समितिले काठमाडौँको चोभारमा सुख्खा बन्दरगाह निर्माण गर्न लागेको हो ।
विश्व वैंकको आर्थिक सहयोगमा निर्माण हुन लागेको यो बन्दरगाह अबको दुई वर्षभित्र सञ्चालनमा ल्याइसक्ने उद्योग, वाणिज्य तथा आपूर्ति मन्त्रालयका प्रवक्ता ढकालले दिनुभयो । बन्दरगाह निर्माणका लागि ठेक्कापट्टा चयनलगायतको सम्पूर्ण तयारी भइसकेको उहाँले बताउनुभयो ।
विगतमा हिमाल सिमेन्ट उद्योगले उपभोग गरेको करिब एक हजार ५४ रोपनी जग्गामध्ये २२५ रोपनी जग्गामा सुक्खा बन्दरगाह निर्माण हुन लागेको हो । बाँकी आठ सय रोपनीमा अन्तर्राष्ट्रिय प्रदर्शनी कक्ष समेत निर्माण गरिने छ । यसमा एउटा आकाशे पुल समेत निर्माण गरिने जानकारी समेत उहाँले दिनुभयो । १५० वटा गाडी र कम्तीमा छसय वटा कन्टेनर अट्ने वायर हाउससहितको सुक्खा बन्दरगाहको निर्माण गर्न लागेको हो ।
विश्व बैंकको करिब दुई अर्ब २५ करोड रुपियाँ लागतमा यो बन्दरगाह निर्माण हुन लागेको हो । नेपाल सरकार र विश्व बैंकबीच सन् २०१३ भएको सहमति अनुसार सन् २०१९ भित्रै यो बन्दरगाह बनाइसक्नुपर्छ । पाँच वर्ष अगाडि भएको उक्त सहमति अनुसार विश्व वैंकले नेपाललाई सहुलियत दरमा ऋण उपलब्ध गराउने छ ।
यसअघि, भैरहवाको यार्ड विस्तार, वीरगञ्जको सेज, कोलकाता–काठमाडौँ करिडोर मनिटरिङ, वीरगञ्ज–काठमाडौँ ब्रोडर क्रसिङ निर्माणका लागि एक करोड ५५ लाख अमेरिकी डलर ऋण सहयोग दिने सहमति नेपाल र विश्व वैंकबीच भएको थियो ।
प्रवक्ता ढकालले भन्नुभयो, “चोभारमा सुख्खा बन्दरगाह निर्माण भइसकेपछि काठमाडौँ आउने मालबाहक सवारी साधनहरू वीरगञ्जमा रोकी भन्सार जाँच गराउनु पर्दैन, सिधै काठमाडौँ आइपुग्ने छ र यहाँ नै ती मालबाहक सवारी साधनहरुको भन्सार जाँच हुनेछ ।”
अहिले काठमाडौँका लागि आउने मालबाहक सवारी साधनहरूको वीरगञ्जमै सिल तोडेर जाँच गर्ने गरिन्छ । यो बन्दरगाह निर्माणपछि भारतको र चीनको बन्दरगाहबाट काठमाडौँ आउने कन्टेनरको सिल काठमाडौँमै तोडेर भन्सार जाँच पास गरिने छ । बन्दरगाह बन्ने भएपछि बल्खुबाट चोभारसम्मको सडक पनि ६ लेनको निर्माण गरिने छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds