लगानी गर्न दुई हजारभन्दा बढी लगानीकर्ता इच्छुक


राममणि दाहाल

हेटौँडा, भदौ १ गते । सरकारले घोषणा गरेको नयाँ औद्योगिक क्षेत्रमा उद्योग स्थापना गर्न करिब दुई हजार पाँच लगानीकर्ता इच्छुक देखिएका छन् । घोषणा गरिएका सातवटा औद्योगिक क्षेत्रमा चिनियाँ र भारतीयसहित दुई हजार पाँच सय उद्योग स्थापना गर्न लगानीकर्ताले इच्छा व्यक्त गर्दै आशयपत्र पेस गरेका हुन् ।
औद्योगिक क्षेत्र व्यवस्थापन लिमिटेडले नयाँ औद्योगिक क्षेत्रमा उद्योग स्थापनाका लागि लगानीकर्तासँग गत असार १७ गते ३० दिने म्याद राखेर आशयपत्र माग गरेको हो ।
प्रस्तावित औद्योगिक क्षेत्रमा कृषि, अटोलगायतका मेसिनरी उद्योग, इलेक्ट्रिकल, फिटिङ, राइस मिल, कपडा, औषधि उत्पादन, सूचना प्रविधिलगायतका सेवा उद्योगहरू स्थापनाका लागि आशयपत्र परेको छ ।
छ महिनाभित्रमा विस्तृत परियोजना प्रस्ताव (डीपीआर) र वातावरणीय प्रभाव मूल्याङ्कन (ईआईए) सम्पन्न गर्ने गरी काम भइरहेको ती औद्योगिक क्षेत्रहरूमा लगानीकर्ताहरूको प्रारम्भिक तथ्याङ्क सङ्कलनका लागि आशयपत्र माग गरिएको थियो ।
औद्योगिक क्षेत्र व्यवस्थापन लिमिटेडको योजना तथा विकास महाशाखाका इन्जिनियर अमृत शाहीले के कति सङ्ख्यामा र के कस्ता प्रकृतिका सम्भाव्य उद्योेगमा लगानी गर्न इच्छुक छन् सोही आधारमा औद्योगिक क्षेत्रमा आवश्यक पूर्वाधार र संरचना निर्माण गर्न आशयपत्र माग गरिएको जानकारी दिनुभयो । उहाँले भन्नुभयो, नयाँ औद्योगिक क्षेत्रमा चिनियाँ र भारतीय लगानीकर्तासमेत उद्योग स्थापनाका लागि इच्छुक देखिएका छन् ।
प्रदेश दुई, छ र सातमा एकएक तथा प्रदेश नम्बर तीन र पाँचमा दुई–दुईवटा नयाँ औद्योगिक क्षेत्र स्थापनाको तयारीमा छन् । प्रस्तावित औद्योगिक क्षेत्रमध्ये सबैभन्दा थोरै क्षेत्रफल मकवानपुरको हेटौँडास्थित मयूरधाप औद्योगिक क्षेत्र र सबैभन्दा धेरै क्षेत्रफल सर्लाही जिल्लास्थित सागरनाथ औद्योगिक क्षेत्रको रहेको छ । औद्योगिक क्षेत्रमा आफूले स्थापना गर्न चाहने उद्योगको विवरणसहित आशयपत्र माग गरिएको थियो ।
प्रारम्भिक तथ्याङ्क अनुसार प्रदेश दुईको सागरनाथ औद्योगिक क्षेत्रमा तीन सय, प्रदेश तीनको हेटौँडास्थित मयूरधाप औद्योगिक क्षेत्रमा चार सय र चितवनको शक्तिखोर औद्योगिक क्षेत्रमा ३५० वटा उद्योग स्थापनाका लागि आशयपत्र परेका छन् ।
इन्जिनियर शाहीले प्रदेश पाँचको रूपन्देहीस्थित मोतीपुर औद्योगिक क्षेत्रमा ४५०, बाँकेको नौबस्ता औद्योगिक क्षेत्रमा २५०, कर्णाली प्रदेशको कैलाली जिल्लामा रहेको लम्की औद्योगिक क्षेत्रमा चार सय र प्रदेश सातको कञ्चनपुर जिल्लामा रहेको दैजी औद्योगिक क्षेत्रमा तीन सय उद्योग स्थापना लगानीकर्ताले आशयपत्र दिएको प्रारम्भिक तथ्याङ्क रहेको जानकारी दिनुभयो ।
कतिपय सीधै मन्त्रालयमा गएको र सङ्कलन गर्नेक्रम जारी रहेकोले उद्योग स्थापनाका लागि आशयपत्र थप हुने सम्भावना रहेको भन्दै उहाँले भन्नुभयो, आशयपत्रले लागनीकर्ताले कस्ता उद्योगमा लगानी गर्न चाहेको हो, कति लगानी गर्ने हो, कहाँ लगानी गर्न चाहन्छन् र सरकारले पानी, बिजुलीलगायतका के कस्ता पूर्वाधार निर्माण गर्नु आवश्यक छ लेखाजोखा गर्न सहज हुनेछ ।
सागरनाथ औद्योगिक क्षेत्रको क्षेत्रफल दुई हजार ३१.३३ हेक्टर, मयूरधाप औद्योगिक क्षेत्र १३४.८६ हेक्टर, शक्तिखोर औद्योगिक क्षेत्र एक हजार १७८.७६ हेक्टर, मोतीपुर औद्योगिक क्षेत्र ५५०.४९, नौबस्ता औद्योगिक क्षेत्र २२८.८६ लम्की औद्योगिक क्षेत्र ७४४.८२ र दैजी औद्योगिक क्षेत्र १९८.७१ हेक्टर क्षेत्रफलमा फैलिएको छ । हेटौँडा औद्योगिक क्षेत्रका प्रमुख नेपाल भूषण वैद्यले मयूरधाप औद्योगिक क्षेत्रमा उद्योग स्थापनाका लागि कार्यालयमा बर्जर पेन्ट्ससहित तीनवटा उद्योगको आशयपत्र परेको जानकारी दिँदै अन्य स्थानमा पनि यहाँ उद्योग स्थापनका लागि आशयपत्र दिएको बताउनुभयो ।
देशको सबैभन्दा ठूलो औद्योगिक क्षेत्रमध्येको एक हेटौँडा औद्योगिक क्षेत्र २०२० सालमा अमेरिकी सरकारको सहयोगमा स्थापना गरिएको थियो ।

थप समाचार
प्रतिकृया
नाम

ईमेल

ठेगना