दुवै रेलमार्ग निर्माणको गृहकार्य तीव्र

भउचप्रसाद यादव

काठमाडौँ, भदौ ३ गते । बहुप्रतीक्षित काठमाडौं–केरुङ रेलमार्गको पूर्व सम्भाव्यता अध्ययन (प्रि–फिजिविलिटी स्टडी) तथा रक्सौल–काठमाडौँ रेलमार्गको ‘फिल्ड वर्क’ कार्य सम्पन्न भएको छ । रेल विभागका प्रवक्ता प्रकाश उपाध्यायले काठमाडौं–केरुङ रेलमार्गको पूर्व सम्भाव्यता अध्ययन तथा रक्सौल–काठमाडौँ रेलमार्गको ‘फिल्ड वर्क’ कार्य सम्पन्न भएको जानकारी दिनुभयो । पूर्व सम्भाव्यता अध्ययन तथा ‘फिल्ड वर्क’ पछि अब छिट्टै नै थप निर्माण प्रक्रिया अगाडि बढाइने तयारी भइरहेको उहाँले बताउनुभयो ।
‘फिल्ड वर्क’ को प्रतिवेदन भारतीय पक्षले तयार गर्नुपर्ने सहमति भए पनि अहिलेसम्म प्रतिवेदन तयार नभएको जानकारी उहाँले दिनुभयो । यो वर्षभित्र नै प्रस्तावित यो दुईटै रेलमार्गको विस्तृत परियोजना प्रतिवेदन (डिपीआर) समेत तयार हुने दाबी भौतिक पूर्वाधार तथा यातायात व्यवस्था मन्त्रालयको छ । केरुङ–काठमाडौँ रेल मार्गको अबको नौ महिना र रक्सौल–काठमाडौँ रेलमार्गको डिपीआर अबको छ महिनाभित्र तयार हुने जानकारी मन्त्रालयले गराएको छ । मन्त्रालयका अनुसार भारत र चीनको खर्चमा नै प्रस्तावित दुइटै रेलमार्गको डिपीआर तयार गरिने छ । rail-marga
यो दुइटै रेलमार्गको निर्माण अनुदान वा ऋण सहयोगमा गर्ने भन्ने विषयमा अहिले दुबै पक्षबीच व्यापक छलफल भइरहेको जानकारी समेत प्रवक्ता उपाध्यायले दिनुभयो । ऋणभन्दा अनुदानमा नै ती रेलमार्गहरूको निर्माण गर्ने पक्षमा नेपाल सरकार रहेको देखिएको छ । केही प्रतिशत ऋण तथा केही प्रतिशत अनुदानको ‘मोडेल’ मा यी रेलमार्गहरूको निर्माण गर्नुपर्ने विषयमा समेत छलफल भइरहेको मन्त्रालयले जनाएको छ ।
समुद्री सतहबाट दुई हजार आठ सय मिटर उचाईमा रहेको काठमाडौं–केरुङ रेलमार्ग निर्माणको लागत खर्च दुई खर्ब ८० रुपियाँ पर्ने अनुमान गरिएको छ ।
नेपाली टोली चीन प्रस्थान
प्रस्तावित केरुङ–काठमाडौँ रेलमार्ग निर्माणका लागि तयार गरिएको पूर्व सम्भाव्यता अध्ययनको प्रतिवेदन प्रस्तुत गर्न नेपाली टोली शनिवार चीनको सियान प्रस्थान गरेको जानकारी भौतिक पूर्वाधार तथा यातायात व्यवस्था मन्त्रालयका प्रवक्ता राजेन्द्र शर्माले दिनुभयो । मन्त्रालयका सचिव मधुसुधन अधिकारी नेतृत्वको चार सदस्यीय नेपाली टोली चीन प्रस्थान गरेको हो ।
नेपाली टोलीले सोमबार र मङ्गलबार चीनको सियानमा केरुङ–काठमाडौँ रेलमार्ग निर्माणका लागि गरिएको पूर्व सम्भाव्यता अध्ययनको प्रतिवेदन प्रस्तुत गर्ने कार्यक्रम रहेको जानकारी समेत प्रवक्ता शर्माले दिनुभयो ।
प्रतिवेदन प्रस्तुतीपछि नेपाली र चिनियाँ प्रतिनिधिबीच हुने छलफलले पूर्व सम्भाव्यता अध्ययन प्रतिवेदनलाई अन्तिम रूप दिने जनाइएको छ । प्रतिवेदनलाई अन्तिम रूप दिएपछि ‘डिपीआर’ तयारी कार्य अगाडि बढाइने छ । टोली बुधबार स्वदेश फर्केने छ ।
केही वर्षयता भारतीय र तिब्बती प्लेटबीचको द्वन्द्वका कारण करिब सय किलोमिटर लामो हुने अनुमान गरिएको प्रस्तावित केरुङ–काठमाडौँ रेलमार्ग निर्माण कार्य अति नै कठिन हुने देखिएको छ । यो रेलमार्ग निर्माणका लागि अहिलेसम्मकै उच्च प्रविधिको आवश्यकता पर्ने रेल विभागले जनाएको छ ।
छुट्टै रेलको डिब्बा
यसैबीच शुक्रबार राजधानीमा सम्पन्न ‘नेपाल–भारत संयुक्त कृषि कार्य समूह’ को बैठकमा भारतबाट नेपालमा रसायनिक मल ढुवानीलाई सहज बनाउन भारतीय रेलवेले छुट्टै रेलको डिब्बा व्यवस्था गर्नेबारे सहमति भएको छ । सहमतिअनुसार भारतीय रेलवेले चाँडै नै छुट्टै रेलवे डिब्बा व्यवस्था गरी नेपालमा रसायनिक मल आपूर्तिलाई थप सहज बनाउने छ ।

 

थप समाचार
प्रतिकृया
नाम

ईमेल

ठेगना