बिम्स्टेकका लागि भरपर्दो सुरक्षा

देवबहादुर कुँवर

काठमाडौँ, भदौं १२ गते । बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास ( बिम्स्टेक ) शिखर सम्मेलन–२०१८ को शान्ति सुरक्षा व्यवस्थापन लागि नेपाली सेनालाई सडकदेखि सम्मेलनस्थलसम्मको जिम्मेवारी दिइएको छ ।  यही भदौ १४ र १५ गते राजधानी काठमाडौँमा हुने बिम्स्टेक शिखर सम्मेलनको सुरक्षाका लागि सेना पैदल ( पट्रोलिङ ) गस्तीमा समेत निस्केको छ । त्यस्तै, सम्मेलनस्थलको भित्री सुरक्षा व्यवस्थापनको जिम्मेवारी पनि सेनालाई दिएको छ । सैनिक जनसम्पर्क तथा सूचना निर्देशनालयका निर्देशक एवं प्रवक्ता गोकुल भण्डारीले बिम्स्टेक जस्तो अन्तर्राष्ट्रिय शिखर सम्मेलनलाई सुरक्षित र व्यवस्थित बनाउन नेपाल सरकारको निर्णय बमोजिम नै सेना सुरक्षा व्यवस्थापनमा खटिएको बताउनुभयो । सेनाले शिखर सम्मेलनका विशिष्ट अतिथिहरुको आवत–जावत हुने महत्वपूर्ण स्थलहरु र सडकका अतिरिक्त उपत्यकाको प्रायः सडक गल्लीहरूमा २४ घण्टा पैदल गस्ती बढाएको छ । पैदल गस्तीमा उपत्यका पृतना अन्तरगत विभिन्न युनिटहरूबाट सुरक्षाकर्मी खटाइएको सेनाले जनाएको छ । bimstec_1
त्यस्तैं, त्रिभुवन अन्तर्राष्ट्रिय विमानस्थलक्षेत्र र होटल सोल्टीमा रहेको सम्मेलन स्थलको सुरक्षा जिम्मेवारी पनि सेनालाई प्रदान गरिएको छ । शिखर सम्मेलनस्थलमा थप सहयोगीको रुपमा नेपाल प्रहरीलाई परिचालन गरिएको छ ।
गृह मन्त्रालयका अनुसार, विशिष्ट अतिथिहरुको (भीभीआईपी) सवारी सञ्चालनदेखि सम्मेलनस्थलको सुरक्षामा दोस्रो तहको सुरक्षा घेरा प्रहरीको उपस्थिति हुनेछ । प्रहरीलाई ‘ब्याक सर्पोट’ मा सशस्त्र प्रहरी परिचालन गरिएको छ ।
पूर्वअभ्यास सम्पन्न
नेपाल प्रहरीले बिम्स्टेक शिखर सम्मेलनमा सहभागी हुने विशिष्ट अतिथिहरुको कार्गेट सवारी सञ्चालनका लागि सोमवार विहान पूर्वअभ्यास गरेको छ । अतिथिहरुलाई आवश्यक सुरक्षा व्यवस्थासहित आवास स्थलसम्म पु¥याउन पूर्वअभ्यास गरिएको हो । त्रिभुवन अन्तर्राष्ट्रिय विमानस्थलदेखि होटल सोल्टीसम्म विहान ८ वजे एक घण्टा लामो कार्गेट सवारी सञ्चालनको पूर्वअभ्यास गरिएको महानगरीय ट्राफिक प्रहरी महाशाखाका प्रमुख वसन्त पन्तले बताउनुभयो ।
विशिष्ट अतिथिहरुको सुरक्षाका लागि दुईटा जामर गाडीसहित नौदेखि १२ वटा कार्गेट सवारी हुने जनाइएको छ । केही अतिथिहरुले ‘बुलेट प्रुफ’ सवारी आफूसँंगै ल्याए पनि केहीलाई भने नेपालमै रहेको सवारी साधनहरु उपलब्ध गराउने तयारी भइरहेको छ ।
बिम्स्टेक सम्मेलनमा भाग लिन म्यानमारका राष्ट्रपति विन मिन्थ १२ गते मङगलवार, श्रीलङ्काका राष्ट्रपति मैंत्रीपाल सिरिसेना र भुटान सरकारका प्रमुख सल्लाहकार छिरिङ वाङचुन १३ गते बुधवार नै काठमाडौं आउँदै हुनुहुन्छ ।
भारतका प्रधानमन्त्री नरेन्द्र मोदी, बङ्गलादेशका प्रधानमन्त्री शेख हसिना वाजेद र थाइल्यान्डका प्रधानमन्त्री पारुत छानोछा १४ गते बिहीबार विहान नेपाल आउँदै हुनुहुन्छ । शिखर सम्मेलनका अतिथिदेखि सहभागी पाहुनाहरु बास बस्ने होटल तथा भ्रमण गर्ने स्थानको सुरक्षा निगरानी उच्च बनाएको छ ।
विमानस्थल दुईघण्टा अवरुद्ध
भारतका प्रधानमन्त्री नरेन्द्र मोदी, बङ्गलादेशका प्रधानमन्त्री शेख हसिना वाजेद र थाइल्यान्डका प्रधानमन्त्री पारुत छानोछा आगमनका क्रममा १४ गते बिहीबार विहान ८ देखि १० बजेसम्मको समयमा विमानस्थलको सम्पूर्ण उडान सेवा बन्द हुने छन् । यस सम्वन्धमा सम्वन्धित निकायलाई जानकारी गराइसकेका छौं, महानगरीय प्रहरी आयुक्त कार्यालयका प्रमुख मनोज न्यौपानेले भन्नुभयो,‘ एकै पटक तीन देशका ‘भीभीआईपी’ को आगमन हुने भएकाले एयरजाम घटाउन छोटो समयका लागि उडान सेवा स्थगित गर्ने निर्णय भएको हो । ’
भीभीआईपीहरुको आगमनसँगै विमानस्थलमा हुने एयर ट्राफिक जाम घटाउन अन्तर्राष्ट्रिय उडान सेवालाई २४ औँ घण्टा खुला राखिने बताइएको छ । त्यस्तैं, शिखर सम्मेलन समापनपछि भीभीआईपी फिर्ता हुने क्रममा पनि केही समय हवाई सेवा अवरुद्ध हुनेछ ।
विदाको सट्टा जोर– विजोर
बिम्स्टेक शिखर सम्मेलनका क्रममा काठमाडौं उपत्यकाको सडकमा हुने सवारी आवागमन सहज र सरल बनाउन जोर–बिजोर सेवा लागू गरिएको छ । गृह मन्त्रालयले १३ र १५ गते विजोर र १४ गते जोर नम्वरका सवारी साधन सञ्चालन गर्न अनुरोध गरेको छ ।
शिखर सम्मेलनको उद्घाटनको दिन १४ गते र समापनको दिन १५ गते सार्वजनिक बिदा दिनुको सट्टा जोर विजोर सेवा सञ्चालन गर्ने निर्णय गरेको हो । त्यस्तैं, उपत्यकामा सञ्चालित शिक्षण संस्थाहरू ( विद्यालय तथा उच्च मावि ) दुई दिन बन्द गर्ने निर्णय गरेको छ ।

थप समाचार
प्रतिकृया
नाम

ईमेल

ठेगना