समिति सभापतिका लागि आज मनोनयन दर्ता

सविता शर्मा 

काठमाडौँ, भदौ १२ गते । राष्ट्रिय सभाका विभिन्न विषयगत समितिका सभापति पदका लागि मङ्गलबार मनोनयन दर्ता हुँदैछ । राष्ट्रिय सभाका सांसदहरूले सभापतिका लागि उम्मेदवारी दिन एक जना प्रस्तावक र एकजनाको समर्थनसहित मङ्गलबार अपराह्न ४ बजेसम्म संसद् सचिवालयमा मनोनयन दर्ता गर्नुपर्ने छ ।
समितिका ज्येष्ठ सदस्यहरूको अध्यक्षतामा बुधबार चार विषयगत समितिहरु बैठक बसी सभापतिको चयन गर्नेछन् । राष्ट्रिय सभा नियमावली, २०७५ को नियम १५० बमोजिम सभापतिको चयन हुनेछ ।
निर्धारित समयभित्र दर्ता भएका प्रस्तावकको दर्ता क्रमअनुसार सम्बन्धित समतिको सूचना पाटीमा सूची प्रकाशन गरिनेछ । यसैगरी सम्बन्धित समितिको बैठकमा प्रस्तावकले प्रस्ताव प्रस्तुत गर्ने र समर्थकले सम्बन्धित प्रस्तावको समर्थन र उक्त प्रस्तावहरू निर्णयार्थ प्रस्तुत गरिनेछ ।  rastriya sava
राष्ट्रिय सभाका दिगो विकास तथा सुशासन, विधायन व्यवस्थापन, प्रत्यायोजित व्यवस्थापन तथा सरकारी आश्वासन र राष्ट्रिय सरोकार तथा समन्वय समितिका लागि सभापतिको मनोनयन हुन लागेको हो ।
राष्ट्रिय सभाका सचिव राजेन्द्र फुयालले एकजनाको मात्र मनोनयन दर्ता भएमा सम्बन्धित समितिको बैठकमा सभापतिको निर्धारण हुनेछ भने एकजनाभन्दा बढीको मनोनयन दर्ता भएमा क्रमैसँग निर्णयार्थ प्रस्तुत गरिने जानकारी दिनुभयो । उहाँले भन्नुभयो–“अन्य निर्वाचन जसरी मतपत्रका आधारमा यहाँ छनोट गर्ने होेइन ।”
यस अघि भदौ ३ गते हुने भनिएको निर्वाचन हेरफेर गरी १० दिन पछाडि सारिएको थियो । राष्ट्रिय सभाका अध्यक्ष गणेशप्रसाद तिमिल्सिनाले विशेष कारणवश समितिका सभापतिहरूको निर्वाचन सार्नुपर्ने भन्दै निर्वाचनका लागि भदौ १३ लाई तोक्नुभएको थियो ।
राष्ट्रिय सभामा नेपाल कम्युनिस्ट पार्टी९नेकपा०का मुख्य सचेतक खिमलाल भट्टराईले राष्ट्रिय सभाका समितिमा सभापति चयनमा खासै समस्या नभएको बताउनुभयो । सबै समितिमा सम्बन्धित समितिका सदस्यहरुमध्येबाट नै सभापति चयन गरिने उल्लेख गर्दै उहाँले भन्नुभयो –“यही व्यक्ति भनेरचाहिँ अझै टुङ्गो लागिसकेको छैन, हामी छलफलमा नै छौं ।”
नेकपाबाट राष्ट्रिय सभाका एक सांसदले दिगो विकास तथा सुशासन समितिमा भैरवसुन्दर श्रेष्ठ, विधायन व्यवस्थापन समितिमा परशुराम मेघी गुरुङ, प्रत्योजित व्यवस्थापन तथा सरकारी आश्वासन समितिमा रामनारायण बिडारी, राष्ट्रिय सरोकार तथा समन्वय समितिमा दिलकुमारी रावल थापा (पार्वती) सभापति हुने सम्भावना रहेको बताउनुभयो ।
राष्ट्रिय सभा गठन भएको पाँचमहिनापछि समिति गठन भएका थिए भने समिति गठन भएको एकमहिना पछि सभापति चयन हुन लागेका हुन् । समितिका बैठक ज्येष्ठ सदस्यको अध्यक्षतामा बस्ने गरेका थिए । गत साउन १७ गते गठन भएका समितिहरुको पहिलो बैठक साउन २२ गते बसेको थियो ।

थप समाचार
प्रतिकृया
नाम

ईमेल

ठेगना