सिंहदबार प्रबलीकरणका लागि अध्ययन


गोरखापत्र समाचारदाता

काठमाडौँ, भदौ १९ गते । भूकम्पका कारण क्षतिग्रस्त सिंहदरबारको पश्चिम भागको प्रवलीकरण के कसरी गर्ने भन्ने बिषय अझै टुङ्गो लागेको छैन । दरबारको पश्चिम पट्टिको भागमा भूकम्पका कारण बढी क्षति पुगेको भए पनि राणाकालीन कलात्मक बेलायती शैलीको दरबार प्रबलीकरण गरेर जोगाउनका लागि राष्ट्रिय पुनःनिर्माण प्राधिकरणले दरबारको इन्जिनियरिङ पक्षको अध्ययन गरेको छ ।
सो अध्ययन गर्न राष्ट्रिय पुनःनिर्माण प्राधिकरणले इन्फ्रास्टक्चर इन्जिनियरिङ रिसर्च एन्ड कन्सलट्यान्ट प्रालिलाई जिम्मा दिएको छ । विगत एक महिनादेखि दरबारको सबै इन्जिनियरिङ पक्षको सूक्ष्म अध्ययन भइरहेको प्राधिकरणका सहसचिव राजुमान मानन्धरले जानकारी दिनुभयो । singha-durbar-
ऐतिहासिक दरबारमा प्रयोग भएका इँट, इँटको जोडाइमा प्रयोग भएको मोटर्र तथा काठहरूको अवस्था कति छ, ती समग्रीहरू के कति बलिया छन् भन्ने विषयमा प्रयोगशालामा परीक्षण भइरहेको मानन्धरले बताउनुभयो ।
अबको करिब दुई साताभित्र सबै अध्ययनको प्रतिवेदन प्राप्त हुने र त्यसपछि के कति लागतमा दरबारको प्रबलीकरण हुनसक्छ भन्ने विषय टुङ्गो लाग्ने उहाँले जानकारी दिनुभयो ।
भूकम्पका कारण क्षति भएको उक्त भाग जोगाउन प्राधिकरणले एक वर्षअघि छोप्ने काम गरेको थियो । तर त्यसले दरबारलाई संरक्षण गर्न सकेको छैन । संरक्षणको प्रयास हुँदाहुँदै पनि दरबारको कौशीमा पानी जमेका कारण दरबारभित्र पानी पसेको छ ।
राष्ट्रिय पुनःनिर्माण प्राधिकरणका प्रमुख कार्यकारी अधिकृत सुुशील ज्ञवालीले पुरातात्विक र ऐतिहासिक महत्व जोगाएर सिंहदरबारको पश्चिम भागको पुनःनिर्माण गर्ने बताउनुभयो ।
सोमबार सिंहदरबारको पश्चिम भागको निरीक्षणपछि ज्ञवालीले भन्नुभयो–“पुरातात्विक महत्वका सम्पदाहरू जोगाएर पुनःनिर्माण गर्ने कुरालाई प्राधिकरणले प्राथमिकता दिएर काम गर्छ ।”
सिंहदरबारको पश्चिम भागलाई के गर्ने भन्नेबारे अध्ययन जारी छ । अध्ययन गर्ने जिम्मेवारी लिएको कन्सलट्यान्ट फर्मलाई शीघ्र प्रतिवेदन बुझाउन निर्देशन दिएको जानकारी दिँदै प्रमुख कार्यकारी अधिकृत ज्ञवालीले भन्नुभयो, “प्रतिवेदन प्राप्त भएको अर्को हप्ता निर्णय गर्छौँ र सिंहदरबार पुनःनिर्माणलाई अघि बढाउँछौं ।”
भूकम्पबाट बढी क्षति पुगेको पश्चिमी भागलाई भत्काएर बनाउने कि प्रबलीकरण गर्ने भनेर स्पष्ट नभएकाले त्यसको अध्ययन गर्न इन्फ्रास्टक्चर इन्जिनियरिङ रिसर्च एन्ड कन्सलट्यान्ट प्रालिलाई जिम्मा दिइएको छ । प्राधिकरणका सहसचिव मानन्धरका अनुसार दुई हप्ताभित्रमा अध्ययन प्रतिवेदन तयार भइसक्छ ।
सिंहदरबारको पश्चिम खण्ड राणा प्रधानमन्त्री चन्द्रशमशेर जबराको पालामा निर्मित सिंहदरबारको वि.सं. २०३० को आगलागीबाट बचेको मौलिक भाग हो । उक्त आगलागीबाट उत्तर, पूर्व र दक्षिण भाग जलेर नष्ट भएको थियो, जसको पछि पुनःनिर्माण गरियो ।
निरीक्षणमा राष्ट्रिय पुनःनिर्माण प्राधिकरणका कार्यकारी सदस्य धुव्र शर्मा, डा. हरिराम पराजुली, सहसचिव मानन्धर लगायत हुनुहुुन्थ्यो ।
सरकारले गत साउन २९ गते प्राधिकरणको प्रमुख कार्यकारी अधिकृतमा नियुक्त गरेपछि ज्ञवालीले सिंहदरबारको पश्चिम भागको अध्ययन छिटो टुङ्ग्याउन अध्ययनको जिम्मेवारी लिएको कम्पनीलाई निर्देशन दिनुभएको थियो ।
यसैबीच, वि.सं. २०३० मा आगलागीबाट नष्ट भए पछि पुनःनिर्माण भएको सिंहदरबारको उत्तर, पूर्व र दक्षिण भागको भने प्रबलीकरण सुरु भइसकेको छ ।
शर्मा एण्ड न्यु टेक्निकल जेभीले प्रबलीकरण सुरु गरेको करिब तीन महिना भएको छ । २४ करोड रुपियाँको लागतमा प्रबलीकरण कार्य १८ महिनाभित्र सम्पन्न गर्ने लक्ष्य छ ।

थप समाचार
प्रतिकृया
नाम

ईमेल

ठेगना