मन्त्रीलाई सांसद्का २६ प्रश्न

नारायण काफ्ले

काठमाडौँ, भदौ २४ गते । सरकारका काम कारबाहीका सम्बन्धमा विभागीय मन्त्रीलाई संसद्मा प्रत्यक्ष प्रश्न सोध्न पाउने प्रतिनिधिसभा नियमावलीको प्रावधान कार्यान्वयनमा आएसँगै प्रश्न दर्ता गर्ने क्रम बढेको छ ।
अघिल्लो साताबाट सुरु भएको प्रश्नोत्तरका लागि प्रतिनिधिसभा प्रश्न व्यवस्थापन शाखामा २४ वटा नयाँ प्रश्न दर्ता भएका छन् । पुरानासहित २६ प्रश्न शाखामा विचाराधीन छन् । निर्धारित बारअनुसार सांसद्ले आइतबार प्रधानमन्त्रीसँग प्रश्न सोध्न पाउनेछन् । अन्य मन्त्रीका लागि पनि बार तोकिएको छ । Samsad-Baithak
विचाराधीन २६ प्रश्नमध्ये चारवटा प्रश्नमा प्रश्नकर्ता सांसदले लिखित जवाफ माग गर्नुभएको छ । अन्य २२ प्रश्नमा भने मौखिक जवाफ माग गरिएको छ । लिखित जवाफ माग गरिएका प्रश्नहरू भने प्रतिनिधिसभाको पूर्ण बैठकमा पेस हुँदैनन् ।
प्रतिनिधिसभा कार्यव्यवस्था परामर्श महाशाखाका सहसचिव वंशीराज पौडेलले प्राप्त प्रश्न स्वीकारयोग्य भए नभएको निर्णयपछि सदनमा लैजाने प्रक्रिया अघि बढाइने बताउनुभयो । पौडेलले भन्नुभयो “प्रश्नहरू धमाधम आइरहेका छन् । आएका प्रश्नको अध्ययन हुन्छ । नियमावलीले प्रतिबन्ध गरेका अवस्थाका प्रश्न अनुमोदन हुँदैनन् । सभामुखबाट स्वीकृत भएपछि प्रश्नको जानकारी सम्बन्धित मन्त्रालयलाई दिन्छौँ ।”
पछिल्लो समयमा दर्ता भएका लिखित जवाफ माग गरिएका चार प्रश्न सबै कांग्रेस सांसद् दिलेन्द्र बडुका हुन् । बडुले परराष्ट्र, स्वास्थ्य र उर्जा मन्त्रालयसँग सम्बन्धित चारवटा प्रश्न दर्ता गर्नुभएको हो ।
यस्तै, मौखिक जवाफ माग गरिएका २२ प्रश्न छन् । जसमा सांसद्हरू सरिता गिरी, सञ्जय गौतम, प्रेम सुवालका प्रश्न छन् । सुवालले विभिन्न मन्त्रालयसँग सम्बन्धित आठ वटा प्रश्न दर्ता गर्नुभएको छ । सबै प्रश्न मौखिक जवाफ माग गरिएका छन् ।
यस्तै, सांसद् दिलेन्द्र बडुकै आठवटा मौखिक जवाफ माग गरिएका प्रश्न छन् । उहाँका प्रश्नमा शिक्षा, स्वास्थ्य, श्रम तथा रोजगार मन्त्रालय लगायतका विभागीय मन्त्रालयका मन्त्रीसँग जवाफ माग गरिएका छन् । यस्तै, सांसद् बिन्दा पाण्डेसहितका सांसद्ले पनि प्रश्न दर्ता गर्नुभएको छ । उहाँहरूले उपत्यकाको छाडा चौपाय व्यवस्थापनबारे प्रश्न दर्ता गर्नुभएको छ । उक्त प्रश्नमा पुशपन्छी तथा विकास मन्त्रालयका तर्फबाट विभागीय मन्त्रीले जवाफ दिनुहुनुेछ ।
यस्तो छ प्रश्नको कार्यविधि
प्रश्न सोध्न चाहने सांसद्हरूले सोध्न चाहेको विषय र मन्त्रालयको जानकारीसहित प्रश्न शाखामा प्रश्न दर्ता गराउनु पर्नेछ । उक्त प्रश्नको जवाफ मौखिक वा लिखित कुन चाहेको पनि स्पष्ट पार्नुपर्नेछ । दर्ता प्रश्न सचिवालयले छनोट गर्नेछ ।
राष्ट्रिय अखण्डता, सार्वभौमिकता, अदालतमा विचाराधीन रहेका विषय, संसदीय समितिले गरेका काम कारबाही लगायतका विषयमा प्रश्न स्वीकार हुने छैनन् । सचिवालयले तयार पारेको प्रश्न सभामुखले स्वीकृत गरेपछि सम्बन्धित मन्त्रालयमा जानकारीका लागि पनि पठाइनेछ ।
सचिवालयले मन्त्रालयमा जानकारी पठाएपछि तोकिएको बार अनुसार प्रश्नोत्तर कार्यक्रम सदनमा चलाउनेछ । सदनको बैठकको पहिलो एक घन्टा प्रश्नोत्तरको कार्यक्रम हुनेछ । प्रश्नोत्तरका लागि प्रधानमन्त्री तथा मन्त्रिपरिषद्को कार्यालयसँग सम्बन्धित प्रश्नका लागि आइतबारको दिन निर्धारण गरिएको छ । त्यसैगरी रक्षा, शिक्षा विज्ञान तथा प्रविधि, उर्जा जलस्रोत तथा सिचाई र भौतिक पूर्वाधार तथा यातायात मन्त्रालयसँग सम्बन्धित प्रश्न सोध्नका लागि सोमबार तोकिएको छ ।
स्वास्थ्य तथा जनससंख्या, कानुन न्याय तथा संसदीय मामिला, संघीय मामिला तथा समान्य प्रशासन, उद्योग, वाणिज्य तथा आपूर्ति मन्त्रालयसँग सम्बन्धित प्रश्नका लागि मंगलबार तोकिएको छ । गृह, कृषि तथा पशुपंक्षी विकास, महिला बालाबालिका तथा ज्येष्ठ नागरिक, वन तथा वातावरण र अर्थ मन्त्रालयसँग सम्बन्धित प्रश्न सोध्नका लागि बुधबार निर्धारण गरिएको छ ।
परराष्ट्र, सहरी विकास, संस्कृति पर्यटन तथा नागरिक उड्डयन र युवा तथा खेलकूद मन्त्रालयका लागि बिहीबार तोकिएको छ । श्रम, रोजगार तथा सामाजिक सुरक्षा, सञ्चार तथा सूचना प्रविधि, खानेपानी र भूमि व्यबस्था, सहकारी तथा गरिबी निवारण मन्त्रालयसँग सम्बन्धित प्रश्न सोध्नका लागि शुक्रबारको समय निर्धारण गरिएको छ ।
प्रतिनिधिसभा नियमावलीको नियम ४० मा प्रश्नोत्तरको व्यबस्था छ । सभामुखले अन्यथा आदेश दिएको अवस्थामा बाहेक हरेक बैठकको पहिलो एक घन्टा प्रश्नोत्तरको कार्यक्रम सञ्चालन हुनेछ । एक दिनमा मौखिक उत्तर सम्बन्धी २० वटा र लिखित उत्तर सम्बन्धी ५० भन्दा बढी प्रश्न सूचीमा नराखिने नियमावलीमा व्यवस्था छ । एक सूचीमा एक सदस्यको दुईवटा भन्दा बढी मौखिक उत्तरका प्रश्न समावेश गरिने छैन ।

 

थप समाचार
प्रतिकृया
नाम

ईमेल

ठेगना