विस्फोटक पदार्थ भित्रिन नदिन सुरक्षामा कडाइ


धनगढी समाचारदाता

धनगढी, असोज २६ गते । चाडपर्व लक्षित सुरक्षालाई मध्यनजर गरेर कैलालीको त्रिनगर भन्सार नाकामा नेपाल प्रहरीले तालिमप्राप्त कुकुरको प्रयोग गरेर सुरक्षा जाँच थालेको छ ।
सीमा क्षेत्रमा हुनसक्ने आपराधिक क्रियाकलाप रोक्ने उद्देश्यले तालिम प्राप्त दुईवटा कुकुरमार्फत सुरक्षा जाँच थालिएको हो । नजिकै रहेको गौरीफन्टा नाका भएर प्रतिबन्धित अवैध हातहतियार, विस्फोटक पदार्थ, लागूऔषध भित्रिन सक्ने र चाडपर्वका बेला शान्तिसुरक्षामा चुनौती हुनसक्ने भएकाले पहिलोपटक यहाँ कुकुरको प्रयोग गरेर सुरक्षामा कडाइ गरिएको छ । ती कुकुरहरू लागूऔषध र विस्फोटक पदार्थ पत्ता लगाउनमा दक्ष रहेको जिल्ला प्रहरी कार्यालय कैलालीले जानकारी दिएको छ । कुनै व्यक्ति वा आपराधिक गिरोहले लागूऔषध वा हतियार, विस्फोटक पदार्थ लुकाइछिपाइ ल्याउने कार्य गरेको खण्डमा तालिमप्राप्त कुकुरले सजिलै पत्ता लगाउने प्रहरीले बताएको छ ।
नेपाल–भारत सीमानाका खुलारहेका कारण जुनसुकै बेला पनि प्रतिबन्धित वस्तु भित्रिन सक्ने भएकाले त्यसलाई नियन्त्रण गर्नका लागि कुकुरको प्रयोग गरिरहेको प्रहरी उपरीक्षक विनोद घिमिरेले जानकारी दिनुभयो । हामीले दुईवटा तालिमप्राप्त कुकुरको प्रयोग गरिरहेका छौँ, उहाँले भन्नुभयो, ती कुकुरले प्रतिबन्धित हातहतियार, विस्फोटक पदार्थ, लागूऔषध भए–नभएको पत्ता लगाउने छन् ।
धनगढीमा लागूऔषधके दुव्र्यसनीहरू बढेका छन् । त्रिनगर भन्सार नाका भएर यसअघि विभिन्न प्रतिबन्धित लागूऔषधहरू भित्र्याउने क्रममा प्रहरीले केही व्यक्तिलाई पक्राउसमेत गरेको थियो । त्रिनगर भन्सारनजिकै रहेको भारतको गौरीफन्टास्थित जङ्गल क्षेत्र लागूऔषध प्रयोगकर्ताको ‘सुरक्षितस्थल’ समेत बनेको बताइन्छ ।
उता र यताका दुव्र्यसनीहरू त्यहीँ जम्मा भएर ‘ड्रग्स’ लिने र ओसारपसारसमेत गर्ने गरेको जनाइएको छ । चाडपर्वको बेला यस्ता घटना हुनसक्ने अवस्थालाई मध्यनजर गरेर तालिमप्राप्त कुकुरको प्रयोग गरेर कडाइ गरेको प्रहरी उपरीक्षक
घिमिरेले बताउनुभयो ।
कैलालीमा १०२ किलोमिटर खुला सिमाना रहेको छ । प्रहरीले अरू नाकामा भने सुरक्षा जाँचमा कुकुरको प्रयोग गरेको छैन । कैलालीको खक्रौला नाका पछिल्लो समय लागूऔषध ओसारपसारको ‘ट्रान्जिट प्वाइन्ट’ बनेको छ । खक्रौलामा तालिमप्राप्त कुकुरको प्रयोग नभए पनि सुरक्षा व्यवस्था भने कडा भएको जनाइएको छ ।
गत आर्थिक वर्ष २०७४÷०७५ मा टीकापुरस्थित खक्रौला नाकाबाट लागूऔषध ओसारपसारको २८ वटा मुद्दा इलाका प्रहरी कार्यालयमा दर्ता भएका थिए । प्रहरीले उक्त घटनामा संलग्न ५३ जनालाई पक्राउ गरेर कारबाही गरेको छ । घटनामा संलग्न सात जना भने अझै पनि फरार रहेको इलाका प्रहरी कार्यालय टीकापुरले जानकारी दिएको छ ।
यसैगरी, चालू आर्थिक वर्षको हालसम्म सोही नाकाबाट लागूऔषध ओसारपसार गर्ने क्रममा तीन जनालाई पक्राउ गरेको इलाका प्रहरी कार्यालय मुद्दा शाखाका सब–इन्स्पेक्टर प्रेम खड्काले जानकारी दिनुभयो । खक्रौला नाकाबाट लागूऔषध ओसारपसार हुने गरेकाले चाडपर्वको बेला सुरक्षा व्यवस्था निकै कडा पारिएको उहाँले जानकारी दिनुभयो । यसअघि मलद्वार, मोबाइलको खोल, जुत्तामोजालगायतमा लागूऔषध लुकाएर ल्याउने क्रममा पक्राउ गरेका छौँ, खड्काले भन्नुभयो, चाडपर्वको बेला त्यसरी नै लागूऔषधको ओसारपसार हुनसक्ने भएकाले अहिले सुरक्षा व्यवस्था निकै कडा बनाएका छौँ ।
नेपालमा प्रतिबन्धित लागूऔषध भारतीय बजारमा निर्वाध रूपमा पाइने भएकाले उताबाट त्यस्ता वस्तु ल्याउने परिपाटी बढी रहेको प्रहरीले भनाइ छ । भारतबाट खैरो हिरोइन र सबैभन्दा बढी नाइट्रोभेटलगायतका ट्याबलेटमा रहेको लागूऔषध ल्याउने गरेको पाइएको इलाका प्रहरी कार्यालय टीकापुरले जानकारी दिएको छ । चाडपर्वको मौका छोपेर लागूऔषधसहित हातहतियारसमेत भित्र्याउन सक्ने भएकाले जिल्लाको सबैतिर सुरक्षा व्यवस्था कडा बनाएको जनाइएको छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds