यात्रुबाट मनपरी भाडा असुलिँदै



दैलेख समाचारदाता

दैलेख, असोज २८ गते । दशैँ नजिकिँदै गर्दा अधिकांश ग्रामीण सडकमा आवतजावत हुने जीप सञ्चालकले यात्रीबाट मनपरि भाडा असुल्ने गरेको पाइएको छ । जिल्लाका सबै स्थानीय तहका अधिकांश वडामा सडक सञ्जाल जोडिए पनि ठूला यातायातका सवारीसाधन सञ्चालन नहुँदा जीप सञ्चालकले यात्रीबाट मनपरि भाडा असुलेका हुन् ।
दशैँको फाइदा उठाउँदै निजी गाडीले सदरमुकामदेखि चामुण्डा विन्द्रासैनीको प्रतिव्यक्ति पाँच सय र काशिकाँधको चार सय रुपियाँ भाडा लिने गरेको पाइएको छ । यसअघि सदरमुकामबाट कुशापानीसम्म बसको भाडा तीन सय रुपियाँ भए पनि स्थानीयवासी जिपमा छ सय तिर्न बाध्य छन् । यहाँका २० किलोमिटरभन्दा बढी दूरीका सबै सडकमा भाडा चार सय रुपियाँभन्दा बढी छ । रिजर्भमा जाने गाडीले पाँच जना यात्रुको करिब आठ हजार रुपियाँ लिने गरेका छन् ।
सदरमुकामदेखि २६ किलोमिटर दूरी रहेको काशिकाँधमा गाडी रिजर्भ गरेर लिँदा सातदेखि १० हजार रुपियाँ खर्च हुने गरेको स्थानीयवासीले गुनासो गरेका छन् । अधिकांश चालकले व्यक्तिगत रूपमा यात्रु लिन नमान्ने भएकाले रिजर्भ गर्नुपर्ने बाध्यता छ । ग्रामीण भेकका दर्जनौँ सडक छन् । मर्मत गरिए पनि अधिकांश सडकमा जनप्रतिनिधिले झारा टार्ने काम गरेको स्थानीयवासीको आरोप छ । सदरमुकामलाई अन्य ग्रामीण सडकसँग जोडेको मध्यपहाडी लोकमार्गको अवस्था पनि नाजुक छ । विभिन्न स्थानमा पहिरो गए पनि मर्मतको काम अझै सुचारु भएको छैन । राजमार्ग छुँदै बेस्तडा, द्वारी कालिका, रानीवन, भैरवी, आठबीस, चामुण्डा विन्द्रासैनी, ठाटिकाँधलगायत ठाउँमा जाने सडकमा यातायात ठप्प छ ।
महावु गाउँपालिकाका धीरेन्द्रबहादुर राणाले सदरमुकाम आउँदा महँगो भाडा तिर्नुपर्ने बाध्यता भएको बताउनुभयो । चाडबाड नजिकिए पनि सडक मर्मत नहुँदा ठूला गाडी सञ्चालन हुन सकेका छैनन् । उहाँले भन्नुभयोे, त्यसैले साना गाडीले चर्को भाडा असुल्दैगरेका छन् । चर्को भाडाका कारण विपन्न नागरिक मारमा परे । पत्रकार महासङ्घ, दैलेखका अध्यक्ष चक्र केसीले स्थानीय प्रशासनको कमजोरीले स्थानीयले सास्ती भोग्नुपरेको आरोप लगाउनुभयो ।
साप्ताहिक रूपमा रकम नबुझाए बोलेरो गाडीको पछाडि यात्रु राख्न नदिने भएकाले रकम बुझाउनुपर्ने बाध्यता रहेको एक चालकले जानकारी दिनुभयो । प्रहरीको मनपरीले व्यवसायीसमेत मारमा परेको उहाँको भनाइ छ । यातायात व्यवसायी भूपेन्द्र मल्लले सडक मर्मत नहुँदा ठूला गाडी जान नसक्ने भएकोले साना सवारीका यातायातले बढी भाडा लिएको दाबी गर्नुभयो । जिल्लाका स्थानीय तहले गत वर्ष सडक निर्माणमा ३५ करोड रकम खर्च गरेका थिए ।
ठूलो रकम खर्च गरी निर्माण गरिएका सडकमा बाह्रै महिना गाडी नचल्दा स्थानीयवासी सास्ती भोग्न बाध्य छन् । गतवर्ष निर्माण गरिएका अधिकांश सडकमा वर्षाका कारण पहिरो गएको छ । अधिकांश सडकमा खाल्डाखुल्डी छन् । गत वर्ष चामुण्डा विन्द्रासैनी नगरपालिकाले सडकमा चार करोड ७६ लाख, नारायण नगरपालिकाले पाँच करोड, दुल्लू नगरपालिकाले चार करोड ५० लाख विनियोजन गरेका थिए । सबै सडकमा अहिले यातायात सेवा अवरुद्ध छ । जिल्ला समन्वय समिति प्रमुख प्रेम थापाले कुनै बेला डोजर आतङ्क भए पनि अहिले अधिकांश सडक बन्द रहेको जानकारी दिनुभयो । गुणस्तरीय सडक निर्माण नहुँदा वर्षामा अधिकांश सडकमा पहिरो आएको र खाल्डाखुल्डी भएको उनको भनाइ छ । एक वर्षअघि गाउँगाउँमा रहेका ९० वडाका ९८ डोजर कता हराए । सडक निर्माणमा जथाभावी रकम खर्चिने तर मर्मतमा ध्यान नदिने कारणले स्थानीयले सास्ती पाउनुपरेको उहाँको भनाइ छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds