हुम्लाको पर्यटन प्रर्वद्धन गर्न “बाईजाउ” कार्यक्रम

हुम्ला समाचारदाता

सिमकोट वैशाख २७ गते । धेरै पर्यटकीय संभावना भएको हुम्ला जिल्लाको पर्यटन क्षेत्रको प्रर्वद्धन गर्न “बाईजाउ” हुम्ला कार्यक्रम आयोजना हुने भएको छ । जिल्लामा रहेका प्राकृतिक सम्पदा एवं साँस्कृति सौन्दर्यको प्रचार प्रसार गरी आन्तरिक तथा बाह्य पर्यटकहरु जिल्लामा भित्र्याउनका लागि यो कार्यक्रम आयोजना गर्न लागिएको हो ।
प्रयत्न नेपालको आयोजना र योङ्ग स्टार क्लबको सहआयोजनामा सदरमुकाम सिमकोटमा संचालन हुने बाईजाउ हुम्ला कार्यक्रम दुई चरणमा हुने प्रयत्न नेपालका अध्यक्ष रविन कुमार बस्नेतले बताउनु भयो । जसमा पहिलो चरणमा आगामी जेठ १५, १६ र १७ गते हुनेछ । यो कार्यक्रममा नेपाली चलचित्र उद्योगका महानायक राजेश हमाल, देउडा गायक नन्दकृष्ण जोशी, पाण्डव बिष्ट, सुरेश शाही, श्रृङखला जोशी, दोहोरी गायक चन्द्र शर्मा, कला लम्साल, आधुनिक गीतका गायक हेमन्त शर्मा, नृत्यकार करिष्मा ढकाल, सुमी मगरको उपस्थिती रहने छ भने साथमा स्थानीय कलाकारहरु मान बहादुर थापा, रोहित रोकाया, कुन्छागं लामा, जगदिश हमाल, छपाल लामा, दलसरा परियार, पर बहादुर थापा, नवराज बोहरा, अर्जुन बोहरा, नृत्यमा कुन्छागं डिकी लामा, पेमा लामाले पछि आफ्नो प्रस्तुति गर्नेछन् । यो “बाईजाउ” हुम्ला पहिलो फेज राखिएको छ भने दोस्रो फेज आगामी भदौ २० देखि २६ गतेसम्म संचालन हुने बस्नेतले बताउनु भयो । दोस्रो फेजमा स्याउ महोत्सव पनि जोडिने भएको छ । यो कार्यक्रमले हुम्लाको पर्यटन प्रर्वद्धनमा ठुलो योगदान पुग्ने विश्वास आयोजकले लिएको छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds