नेकपाको एकता प्रक्रिया टुङ्गिने

गोरखापत्र समाचारदाता

yuba_kabita 2काठमाडौँ, जेठ २ गते । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ’प्रचण्ड’ ले तत्कालीन नेकपा (एमाले) र नेकपा (माओवादी केन्द्र) बीचको एकता टुङ्गिइसकेको बताउनुभएको छ ।
युवा सङ्घ नेपालको २९औँ वार्षिकोत्सवको अवसरमा बुधबार राजधानीमा आयोजित कार्यक्रमलाई सम्बोधन गर्दै उहाँले भन्नुभयो, “एकता टुङ्गिन्छ, एकता टुङिगसक्यो भने पनि हुन्छ किनभने फलामे ढोका खुलिसकेको छ, अरु त सर्दै जान्छ ।”
तर यो धेरै हल्ला भएको दिन टुङ्गिन्छ कि एक दुई दिन अघिपछि हुन्छ म अहिले भन्न सक्दैन भन्दै उहाँले एक वर्षअघि हल्ला नै नभएको दिन पार्टी एकताको घोषणा गरिएको स्मरण समेत गर्नुभयो । एक वर्षअघि जेठ ३ गते तत्कालीन नेकपा (एमाले) र नेकपा (माओवादी केन्द्र)बीच एकीकरण भएको थियो ।
“हाम्रो कोसिस त जेठ ३ गते सम्पूर्ण एकताको घोषणा गर्ने नै छ, भएन भने चिन्ता नलिनुहोला ४ गते होला, ५ गते होला, ६ गते होला केही फरक पर्दैन” प्रचण्डले भन्नुभयो, “हामी टुङ्ग्याउँछौँ यो कुरामा विश्वस्त हुनुहोस् ।” सबै जनसङ्गठनको घोषणा ३ गते नै सक्नुपर्नेमा मेरो जोड रहेको बताउँदै उहाँले तपाईँ युवाले अलि जोडै गर्नुभयो भने तपाईंहरूको एकता ३ गते नै सक्न पनि सकिन्छ उहाँले स्पष्ट पार्नुभयो ।

नेकपाका वरिष्ठ नेता माधवकुमार नेपालले अझ धेरै नेपालीको मन जित्न बाँकी रहेको बताउँदै उहाँले हाम्रो काम र व्यवहारले जनताको मन जित्न सक्छ । जनताका पीर, मर्कामा सहयोगी भयौँ, जनताको दुःख कष्टमा साथ दियौँ भने जनताले हामीलाई मन पराउनेछन् भन्नुभयो ।
कम्युनिस्ट नेताहरूको आचरण र व्यवहार अहिले परीक्षणमा रहेको बताउँदै उहाँले जनताका समस्या र चाहना के हुन् त्यसबारे विशेष चासो दिनुपर्ने आवश्यकतामाथि जोड दिनुभयो । कम सुन्ने र बढी बोल्ने आचरणको उहाँले आलोचना समेत गर्नुभयो ।
अर्का वरिष्ठ नेता झलनाथ खनालले जेठ भित्रमा पार्टी एकता टुङ्गिनेमा विश्वास व्यक्त गर्दै अहिले मुलुकमा पँुजीवादी लोकतन्त्र आएको बताउनुभयो । अहिलेको लोकतन्त्र र निर्वाचन प्रणालीले पुँजीवादी र धनाढ्यहरू मात्र नेतृत्व गर्न सक्दछ, गरिब वर्ग सक्दैन भन्नुभयो । अबको बाटो समाजवाद रहेको चर्चा गर्दै उहाँले समाजवाद प्राप्तिका लागि युवा गोलबन्द हुनुपर्ने आवश्यकतामाथि जोड दिनुभयो ।
नेकपाका सचिवालय सदस्य ईश्वर पोखरेलले पार्टी एकताको एक वर्षको अवधिमा एकताको सबै प्रक्रिया टुङ्गिएको समाचार सुन्ने आफ्नो इच्छा रहेको बताउनुभयो । पार्टी एकताका बाँकी काम छिटोभन्दा छिटो टुङ्गयाउन उहाँले पार्टी नेतृत्वसँग आग्रह समेत गर्नुभयो ।
अबका दिनमा पार्टीको विचार स्पष्ट हुनुपर्नेमा जोड दिँदै उहाँले विचारमा स्पष्टता भएन भने अबका दिनमा पार्टी सोचे जस्तो अगाडि बढ्न नसक्ने दाबी समेत गर्नुभयो ।
नेकपाका महासचिव विष्णु पौडेलले जेठ ३ गते नेकपाको पार्टी एकीकरण टुङ्गिएको घोषणा हुने बताउनुभयो । “पार्टी एकता अबको केही घण्टाभित्र टुङ्गिन्छ” महासचिव पौडेलले भन्नुभयो, “पार्टी एकताका केही काम टुङ्गिन नसकेकोमा केही गुनासा आइरहेका छन् अब त्यो गुनासो पनि धेरै दिन सुन्नु पर्दैन, जेठ ३ गते विहान एकता प्रक्रियामा बाँकी रहेका विषय टुङ्गिएको घोषणा हुनेछ ।”
१५० जना नेकपा प्रवेश
सो अवसरमा नेकपा (विपल्व) का सचिवालय सदस्य विनोद राईको नेतृत्वमा १५० जनाले नेकपा प्रवेश गर्नुभयो । नेकपा वरिष्ठ नेता माधवकुमार नेपालले नवप्रवेशीहरूलाई अबिर माला लगाएर पार्टी प्रवेश गराउनुभएको थियो ।

 

 

 

 

 

 

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds