सहर बजारमा लोकप्रिय हुँदै लोकगीत

यलु जोशी

galbandi_1काठमाडौँ, असार २६ गते । कुनै बेला लोकगीत भनेपछि नाक खुम्च्याउने युवापुस्ता अहिले यसैमा झुम्न थालेका छन् । लोकगीतमा नाच्न, गाउन र रमाउन उनीहरू अगाडि नै छन् ।
आधुनिकताको विकाससँगै लोकसाङ्गीत धराशयी बन्दै गएको थियो तर प्रविधिको कारण लोकगीत फेरि जुर्मुराउन थालेको छ । यतिखेर लोकगीत युवाको मात्र होइन बालबालिकाको मुखमा पनि झुन्डिएकै हुन्छ । देशभित्रकै लोकगीतले बाहिर गीतसङ्गीतलाई पनि विस्थापित गर्दै छ । कुनै बेला हिन्दी गीतसङ्गीतको एकछत्र प्रभाव थियो तर अहिले होटल, रेस्टुराँ, पार्टी आदिमा लोकगीतकै प्रभाव बढ्दो छ ।
सार्वजिनक स्थलमा मात्र होइन, प्रविधिमा पनि लोकगीतले प्रभाव जमाउँदै छ । लोकगायिका दुर्गा गुरुङ भन्नुहुन्छ, ‘‘अहिले युट्युबको जमाना आयो । सर्जकले आफ्ना गीतहरू नचाहँदा नचाहँदै पनि युट्युबबाट सार्वजनिक गर्नुपर्ने परिस्थिति निर्माण भएको छ । ’’ आजभोलि कुन गीत कति चर्चामा छ भन्ने मूल्याङ्कन युट्युबको ट्रेडिङलाई आधार मानेर गरिन्छ । युट्युबको ट्रेडिङमा नेपाली लोक तथा दोहोरी गीतले पकड जमाएको उदाहरण दिँदै उहाँ यसबाट कलाकारहरूले राम्रो आम्दानी पनि गरिरहेको बताउनुहुन्छ ।
हाल चर्चामा रहेको लोकदोहोरि ‘गलबन्दी’ले युट्युबमा राखिएको १० दिनमा ७१ लाख बढी ‘भ्युज’ पाएको थियो । प्रकाश सपूत र शान्तिश्री परियारको यो गीतले हालसम्म एक करोड ३३ लाख १५४ भ्युज पाइसकेको छ । अहिले सार्वजनिक यातायातदेखि टिकटक भिडियोसम्म गलबन्दी बोलको गीत बजिरहेको हुन्छ । गायक प्रकाश सपुत भन्नुहुन्छ, ‘‘लोकदोहरी युवापुस्ताको मन मनमा रहन थालेको छ । ’’
उहाँहरूकै तीन महिनाअघि आएको ‘दोहोरी ब्याटल’ पनि युवापुस्ता माझ लोकप्रिय भएको थियो । उहाँको एक वर्ष पहिले बजारमा आएको अर्को गीत ‘बोल माया’ ले पनि युट्युबमा हालसम्म एक करोड २९ लाख ६४ हजार १७८ भन्दा बढी भ्युज पाइसकेको छ । यस्तै १७ हजारभन्दा बढी कमेन्ट नै पाएको छ ।
विक्रम परियार तथा सुमित्रा तामाङको ‘चौतारीमा बर...’ बोलको गीतले पनि २६ लाख ६४ हजार युट्युबमा हेरिसकेका छन् । कुलेन्द्र विश्वकर्मा र मेलिना राईको स्वरमा रहेको ‘मलाई देखेर..’ बोलको गीत पनि चर्चामा छ ।
म्युजिक नेपालको अफिसियल पेजबाट तीन महिनाअघि सार्वजनिक भएको उक्त गीतलाई लगभग ४५ लाख पटक हेरिएको छ । दुई हजार २१ प्रतिक्रिया आएका छन् । गायिका मेलिना राई भन्नुहुन्छ, ‘‘आफ्नो मिहिनेतलाई दर्शकले मन पराउँदा ऊर्जा झन् बढ्दो रहेछ । ’’ गीतको लोकप्रियतासँगै माग पनि बढ्दै गएको उहाँको अनुभव छ ।
युट्युबमा सन्दिप लामिछानेको ‘लालुमै’लाई एक करोड ९० लाखभन्दा बढीले हेरिसकेका छन् । विगत एक दशकदेखि अस्ट्रेलिया बस्दै आउनुभएका विक्रम परियारले नेपालमा त युवापुस्ताले लोकगीतलाई मन पराउन थालिसकेको बताउँदै भन्नुभयो, ‘‘यहाँ पनि लोकगीतको धेरै माग छ । ’’
‘बल्ल प¥यो निरमाया माकुरी जालैमा’, ‘खैरेनीमा गेट’, ‘घुम्तीनिर भेट भयो’ लगायत गीत सदाबाहर छ’, उहाँले बताउनुभयो । पहिलेका नेपाली गीतमा छुट्टै खालका मीठास हुन्थे, लोक, आधुनिक र भजन गायिका ज्ञानु राणा भन्नुहुन्छ, ‘‘अहिलेका नेपाली गीतले हाम्रो संस्कृति नै हराउँदै गएको आभास हुन्छ । ’’
युवापुस्ताले मन पराएको छ, यसमा कुनै दुई मत छैन तर नयाँ गीत यथार्थमा भन्दा पनि काल्पनिकतामा रच्ने गरिएको उहाँको अनुभव छ । गीतको रचनाका लागि समाजसँग भिज्नु आवश्यक रहेको गायिका राणा बताउनुहुन्छ । पहिले गीतको बजार सानो थियो, तर अहिले यो एउटा ठूलो उद्योगको रूपमा स्थापित भइसकेपछि प्रतिस्पर्धाका नाममा विकृति पनि भित्रिएको उहाँको अनुभव छ ।
कुनै गीतका शब्द राम्रा भए पनि छायाङ्कनमा पहिरनको छनोट राम्रो पाइँदैन । ‘तरकारी काउली बसी बसी खाउली’– कृष्ण समीप सुवेदीको यो गीतमा केही मौलिकता पाइए पनि पहिरनको छनोट भने सुहाउँदो छैन –गायिका राणाको भनाइ छ । नेपाली सङ्गीतमा नयाँपन ल्याउँदै राष्ट्रियता बचाउने गीतमा नयाँपुस्ताको ध्यान बढी जानुपर्ने उहाँको सुझाव छ । बाहिरी गीतलाई लोकगीतले विस्तापित गर्दा देशकै कला संस्कृतिको विकास हुनुका साथै आय पनि बढ्ने बताइएको छ ।

 

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds