ठेकेदारको लापरबाहीले यात्रुलाई सास्ती
सुर्खेतको प्रमुख पर्यटकीय स्थल काँक्रेविहार जाने सडक वर्षौंदेखि अलपत्र परेको छ । मङ्गलगढी चोकदेखि लाटीकोइलीको शिव मन्दिरसम्मको सडक स्तरोन्नति नहुँदा स्थानीय नागरिकले सास्ती बेहोर्नु परेको छ । लाटीकोइली क्षेत्रका नागरिकका साथै काँक्रेविहार पुग्ने पर्यटकले सास्ती भोग्दै आएका छन् ।
मनपरी भाडा असुल्दै अटो
कर्णाली प्रदेशको राजधानी वीरेन्द्रनगरमा अटोरिक्साले मनपरी भाडा असुल्दै आएका छन् । संयुक्त यातायात व्यवसायीले वीरेन्द्रनगरमा सञ्चालन गरेको नगर बसले यात्रुलाई केही सहज भएको थियो । स्थानीय जुनकला सिंहका अनुसार नगर बसले धुलियाबिटदेखि २० रुपियाँमा प्रदेश अस्पताल पु¥याउँथ्यो । अहिले अटोमा जाँदा कम्तीमा तीन सय रुपियाँ तिर्नु पर्छ । त्यही पनि मनपरी छ ।
वित्तीय, प्रशासनिक र कानुनी सङ्घीयता लानुभएन: मुख्यमन्त्री शर्मा
कर्णाली प्रदेशका मुख्यमन्त्री राजकुमार शर्माले कर्णाली प्रदेशलाई क्षतिपूर्ति सहितको अधिकार चाहिएको बताउनुभयो । उहाँले भन्नुभयो कर्णाली प्रदेश पछि परेको होइन, पछि पारिएको प्रदेश भएकाले विशेष अधिकार पाउनुपर्छ । ठुलो र विकट भूगोल भएको कर्णालीमा जनसङ्ख्याको आधारमा बजेट विनियोजन हुनु राम्रो होइन । कर्णालीमा बजेटमा क्षतिपूर्ति सहितको सङ्घ सरकारले विशेष कार्यक्रम ल्याएर विकास गरिनुपर्दछ ।
‘कर्णाली उज्यालो योजनामा प्राधिकरण’
नेपाल विद्युत् प्राधिकरणका कार्यकारी निर्देशक कुलमान घिसिङले प्राधिकरण कर्णाली उज्यालो पार्ने अभियानमा जुटेको बताउनुभएको छ । कार्यकारी निर्देशक घिसिङसहितको टोलीले कर्णालीमा विद्युत् क्षेत्रमा गरिरहेको काम र आगामी योजनाका बारेमा जुम्लामा बोल्दै प्राथमिकतामा राखेको जनाइएको हो । जुम्ला पुगेर कार्यकारी निर्देशक घिसिङले कोहलपुर, सुर्खेत, दैलेख, कालीकोट हँुदै जुम्लासम्मको १३२ केभी क्षमताको विद्युत् प्रसारण लाइन अगाडि बढाइएको पनि जनाउनुभयो ।
लैङ्गिक हिंसाविरुद्ध साङ्गीतिक महोत्सव
हुम्लाको सर्केगाड गाउँपालिकामा राष्ट्रिय कलाकारको उपस्थितिमा १६ दिने लैङ्गिक हिंसाविरुद्ध साङ्गीतिक महोत्सव सम्पन्न भएको छ । महिला हिंसाविरुद्धको अभियानका अवसरमा मर्यादित महिनावारी तथा विभेद जोखिम न्यूनीकरण व्यवस्थापनसम्बन्धी साङ्गीतिक महोत्सव गरिएको हो । महोत्सवमा कलाकार रेखा जोशी, इब्सु सञ्याल, सुनिता बुढा क्षेत्री र तुलसी विकको सहभागिता रहेको गाउँपालिकाका अध्यक्ष ठानबहादुर रोकायाले बताउनुभयो । महिनावारी हुँदा ‘पर होइन घर भन्ने’ मूल नाराका साथ महोत्सव सञ्चालन गरिएको हो ।
भिरबाट लडेर युवतीको मृत्यु
बुधबार दिउँसो भिरबाट लडेर एक जना १७ वर्षीय युवतीको मृत्यु भएको छ । वनमा पशु चराउन जानेक्रममा युवती भिरबाट लड्नुभएको र उहाँको मृत्यु भएको हो ।
मानसिक समस्या पहिचान गर्न परामर्श सेवा
रुकुम पश्चिमको आठबीसकोट नगरपालिकामा मानसिक समस्या पहिचान भएका महिलाको सङ्ख्या धेरै रहेको पाइएको छ । भूकम्पपछि प्रभावित क्षेत्रमा विभिन्न सङ्घसंस्थाको सहयोग तथा नगरपालिकाको समन्वयमा मनोसामाजिक परामर्श सेवा सञ्चालन गरिएको थियो । उक्त क्रममा मानसिक समस्या पहिचान भएका महिलाको सङ्ख्या धेरै देखिएको हो ।
एकीकृत जनस्वास्थ्य अभियान सञ्चालन
कालीकोटको पचालझरना गाउँपालिमा सञ्चालन गरिएको एकीकृत जनस्वास्थ्य अभियान तथा विशेषज्ञ स्वास्थ्य शिविरबाट नौ सय ७० ले सेवा लिएका छन् ।
पत्रकार कुमाल प्रहरी नियन्त्रणमा
नेपाल पत्रकार महासङ्घ कालीकोट शाखाका सहसचिव कर्ण कुमाललाई प्रहरीले नियन्त्रणमा लिएर हिरासतमा राखेको छ ।
दलका नेता कार्यकर्ता भूकम्प प्रभावित क्षेत्रमा सक्रिय
कात्तिक १७ गते गएको भूकम्पबाट घरबार गुमाएका सर्वसाधारणले कहिले अस्थायी आवास निर्माणका लागि रकम पाउँछन् भन्ने अन्योल कायमै छ ।
