• ६ साउन २०८१, आइतबार

‘गण्डकी आर्थिक त्रिभुजको नमुना परियोजना बहुआयामिक विकासमा कोसेढुङ्गा सावित हुन्छ’

blog

प्रधानमन्त्री पुष्पकमल दाहाल ‘प्रचण्ड’ बिहीबार बसेको प्रतिनिधिसभा बैठकमा उपस्थित हुनुहुँदै । तस्बिर : प्रधानमन्त्रीको सचिवालय

काठमाडौँ, असार ६ गते । प्रधानमन्त्री पुष्पकमल दाहाल ‘प्रचण्ड’ले बजेटमार्फत प्रस्तुत भएको गण्डकी आर्थिक त्रिभुजको नमूना परियोजना नेपालको आर्थिक तथा सामाजिक विकासमा कोसेढुङ्गा साबित हुने बताउनुभएको भएको छ ।

बिहीबार बसेको प्रतिनिधिसभा बैठकमा सांसदहरूले सोध्नुभएका प्रश्नहरूको जवाफ दिनुुहुँदै प्रधानमन्त्रीले एकीकृत विकासको अवधारणा अनुरूप नीजि क्षेत्र समेतको सहकार्यमा भरतपुर–बुटवल–पोखरा (मुग्लिन) भरतपुरलाई तीन कोणमा राखी तयार पारिएको योजनाले देशको बहुआयामिक विकासमा महत्त्वपूर्ण योगदान गर्ने विश्वास व्यक्त गर्नुभयो ।

“यो नेपालको आर्थिक तथा सामाजिक विकासमा कोसेढुङ्गा साबित हुनेछ”, प्रधानमन्त्री प्रचण्डले भन्नुभयो, “यो परियोजनाबाट यातायात पूर्वाधारको विकास मात्र नभइ उद्योग, ऊर्जा, कृषि तथा पर्यटन क्षेत्रको विकाससँगै रोजगारीका अवसरहरू सिर्जना हुने लक्ष्य लिइएको छ ।”

वार्षिक बजेट तथा कार्यक्रम तर्जुमा गर्दा व्यावहारिक र प्रतिफल प्राप्त होस् भन्ने उद्देश्यले सङ्घ, प्रदेश र स्थनीय तहमा आयोजनाहरूबिच दोहोरोपना हुन नदिने नीति लिएको उल्लेख गर्नुहुँदै प्रधानमन्त्रीले ठुला आयोजना सङ्घबाट कार्यान्वयन गर्ने, मझौला प्रकृतिका आयोजना प्रदेशबाट र साना आयोजना स्थानीय तहबाट कार्यान्वयन गर्ने विषयमा सरकार दृढ रहेको स्पष्ट पार्नुभयो ।

उहाँले वित्तीय हस्तान्तरणअन्तर्गत सशर्त अनुदानतर्फका कतिपय आयोजना सम्पन्न गर्ने कार्यका लागि केही आयोजना तथा कार्यक्रमहरूमा कम रकम देखिए पनि यस प्रकारका आयोजनाहरू प्रदेश र स्थानीय सरकारबाटै कार्यान्वयन हुने जानकारी गराउनुभयो ।